ياعسي البدر نوره مايغيب

عن حبيبٍ بقي منه الكلام

(( إنطلاق ) )

* راج ..

طيري في السما ..

شالته امواج الرياح ..

يا ترى وين نيته ..

انتزع حريته ..

وخانني مع السحابه .. والعجاج ..

انشر فْـ كل السما ..

ريش جنحانك ..

يا طيري اللي عذبتك ...

قيود خلانك ..

كل زادٍ .. وانت في الاغلال جوع ..

وكل شربٍٍ وانت في سجنك هماج ..

يا رفيق الخير ..

لك حق تختار ..

بين الديار .. ديار ..

وبين الاهل صحاب ..

وبعض العمار قفار ..

راج طيري في السديم ودار ..

(لاواحلالاه ياطيري)

*راج:طار في السماء

(( أبي النسيان ) )

تذكرتك .. وأبي النسيان ألايا خل ساعدني

أنا مالي ورى الذكرى .. إلى مات الأمل خيره

أنا ودي على الفرقا حبيبي لو تعاهدني

وإلى شفتك .. تصد ولاتجيب لما مضى سيره

تخيّر غير هذي الأرض .. مكانٍ به تواعدني

تخيّر لك مكانٍ صعب .. أعرف فيوم تقديره

عسى الجرح الذي يدينك أشوفه عنك يبعدني

أنا اللي أكرهك .. وأحبك .. شعورٍ صعب تفسيره

حسيبك .. يالهوى الظالم .. حسيبك لاتعاندني

بيلقى صاحبي غيري وأباالقى في العرب غيره

(( إنشد البحار ) )

أنشد البحار على سر الحنين

عن قصيد البحر .. وجروح السفين

عن حبال الشوق تظمأ للشطوط

عن حروق الملح في شفاه السنين

ما عرفت الغوص في اليم المخيف

ولا رهنت العمر في الدر الثمين

جيت أنا من نجد .. في قلبي الرياض

وفي عروقي التهم .. والبيت الأمين

في كفوفي تصرم نخيل الحسا

ومن ذواري الرمل غادي لي جبين

جيتكم .. والعشق يطرحني سؤال

هو صحيح الشط له صدر ويدين

عانقتني بيوتكم .. وأنا بعيد

ما عبرت الجسر .. ما شفت القطين

ياهوى البحرين مريت الديار

عابرٍ والقلب باللهفة ضنين

لين حطت بي رحالي في هواك

وانبعث نبع المحبة في الكنين

(( أغنية في العشق والموت ) )

ضمي مَلامح صورته ..

ضميه .. لعله يفيق ..

يَشهق .. أو يَردّ النَّفسْ ..

ضمّيه لعَله حبس ..

صٌوته .. رعشة عرٌوقه ..

وخيم حزين الصمت فُوقه ..

مات .. مات