صوفی غلام مصطفی تبسم

(وفات: 1978ء)

رخشندہ ترے حسن سے رخسارِ یقیں ہے

تابندہ ترے عشق سے ایماں کی جبیں ہے

چمکا ہے تری ذات سے انساں کا مقدر

تو خاتَمِ کونین کا رخشندہ نگیں ہے

ہر قول ترا حرفِ صداقت کا ہے ضامن

ہر فعل ترا حسنِ ارادت کا امیں ہے

ہر گام ترا ہمِ قدمِ گردشِ دوراں

ہر جادہ تری رہگزرِ خُلدِ بریں ہے

جس میں ہو ترا ذکر وہی بزم ہے رنگیں

جس میں ہو ترا نام وہی بات حسیں ہے

چمکی تھی کبھی جو ترے نقشِ کفِ پا سے

اب تک وہ زمیں چاند ستاروں کی زمیں ہے

آنکھوں میں ہے اُس خلقِ مجسم کا تصور

اک خلدِ مسرت مری نظروں کے قریں ہے