اُن کی مہک نے دل کے غنچے کھلا دیے ہیں
یادِ خدا کے دل میں ساماں سجا دیے ہیں
شمعِ اَحَد جلا کے پیغامِ حق سُنا کے
جو بے خُدا تھے ناداں وہ باخُدا کیے ہیں
گھر میں نہ کچھ رکھا ہے یہ شانِ مصطفی ہے
کُل سیم و زر جواہر بہ رہِ خدا دیے ہیں
جنّ و بشر، ملائک، قربان سب خلائق
درجے تمام حاصل بعد از خدا کیے ہیں
نوعِ بشر کو کیوں نہ قسمت پہ ناز ہو گا
خالق نے مصطفی بھی انساں بنا دیے ہیں
وحشی، گنوار، بربر، صحرانشیں، ستمگر
تعلیمِ مصطفی نے انساں بنا دیے ہیں
کیا فکر تشنگی کی شاہیںؔ کو روزِ محشر
ساقی نے جامِ کوثر بھر بھر پلا دیے ہیں