أحمد منصور: يعني الوصف أنا مش عايز أكرر الوصف اللي ذكره خالد العظم وهو بيصف إزاي الواحد كان يدخل سنتين ويصبح مهيأ إنه ممكن يبقى رئيس جمهورية ويعمل انقلاب، لكن برضو أنا كنت أريد أفهم التركيبة اللي داخل الجيش حتى نفهم إزاي كان مسلسل الانقلابات كان بيتم والترتيب بتاع الانقلابات بيتم، بعد الانقلاب بفترة وجيزة جدًا دعوا أمين الحافظ.

أحمد أبو صالح [مقاطعًا] : والشيشكلي من حماة لعلمك، أديب الشيشكلي حموي طبعًا.

أحمد منصور: وطبعًا الحوراني حموي..

أحمد أبو صالح: أيوه طبعًا.

أحمد منصور: عُيِّن أمين الحافظ وزير للداخلية، أنت عُيِّنت وزير.

أحمد أبو صالح: الأشغال العامة.

أحمد منصور: للأشغال العامة، كان فيه وزراء ناصريين وكان فيه وزراء قوميين.

أحمد أبو صالح: أي نعم، نعم.

أحمد منصور: هؤلاء الوزراء في 27 إبريل 63 يعني في فترة وجيزة جدًا بعد الانقلاب.

أحمد أبو صالح: نعم.

أحمد منصور: يعني ما كملوش شهر وشوية راحوا طالعين من الوزارة احتجاجًا على ما فيها، لكن اللي قبل ده هو إن الانقلاب اللي بدأ في 8 مارس، في 14 مارس بعدها بأسبوع يعني لسة الناس بتلملم حاجاتها وبدأت مرحلة من التهريج السياسي جديدة اسمها الوحدة بين مصر وسوريا والعراق.

أحمد أبو صالح: نعم.

محاولات الوحدة بين مصر وسوريا والعراق

أحمد منصور: ناس بقى لها أسبوع عاملة انقلاب، يعني أنت لسة ما استملتش مكتبك وبدأتوا تبحثوا الوحدة بين مصر وسوريا والعراق، قول لنا القصة دي، لأنك أكيد لعبت فيها دور.