أحمد جبريل: لا ما بدلناه للأسف هذا راح هيك يعني عارف كيف..

الأسيران الإسرائيليان وتسليمهما دون ثمن

أحمد منصور: كيف راح هيك قول لي؟

أحمد جبريل: فأسرناه وجبناه وحققت معه وهو يهودي شرقي كان تونسي أصله يعني وقائد دبابة، استنفر أبو عمار علينا والإسرائيليين هددوا كالعادة إنه هلا بدهم يبلشوا القصف من الجو ومن الأرض ومن البحر إذا لم يُطلَّق سراح هذا الجندي، أبو عمار جمع القيادة الفلسطينية واللبنانية أنا قلت لك ما كنت أحضر وبدأ يتحدث بهالمواضيع وبعث لي المرحوم سعد صايل عارف كيف إنه يا أخ أبو جهاد من شان الله خلينا نحلها، قلت له إنتوا عندكم أسير إسرائيلي من قبل أسقِطت طائرته في الجنوب طيار إسرائيلي سكاي هوك

أحمد منصور: اللي هو اللي لا زالت المشكلة قائمة عليه إلى الآن؟

أحمد جبريل: لا هذا قبل 1982 هذا بـ1981 اُسقِط فوق النبطية، فهذا الطيار مأسور عندهم قلت له أنا بوافق على شغلة إنه هالطيار وهذا القائد الدبابة هدول ما بينعطوا للإسرائيليين إلا إذا الإسرائيليين..

أحمد منصور: فكوا الحصار.

أحمد جبريل: فكوا.. لا المعتقلين الأسرى اللي اعتقلوهم يعطونا إياهم عارف كيف، فصار اجتماع قيادة فلسطينية ولبنانية وبصراحة إجوا اتصلوا فينا وتعال يا أخي يعني إجيت اجتمعت عارف كيف قلت لهم إحنا فيه أسرى إلينا وإليكم أسرى وهالشيء ليش نسلم هذا الإسرائيلي؟ بدنا ثمن مقابل هذا الموضوع فأخذنا وعد أن مستحيل أن نخرج من لبنان ومن بيروت بدون ما الأسرى الفلسطينيين أو اللبنانيين يسلموهم الإسرائيليين مقابل هذا قائد الدبابة والطيار الإسرائيلي..

أحمد منصور: وعد من مين؟

أحمد جبريل: أبو عمار قال أنا هذا وعد وأنا حكيت مع الوزان والوزان حكى مع فيليب حبيب وفيليب حبيب حكى مع الإسرائيليين واتفقنا على هذا الموضوع.

أحمد منصور: طبعا فيليب حبيب دخل مبكرا في عشرة يونيو.