حسين الشافعي: والغريب أن هو كان كل واحد بيبقى واخد نمرة السلاح المخصص له، فيبقى فيه عدد من البنادق بعدد الطلبة اللي في العنبر فنمرة السلاح هي النمرة اللي معروف بيها، يعني كل ملابسك تحط عليها نفس النمرة، فكان

(عبدالمنعم رياض) نمرة (96) و (حسين الشافعي) كان نمرة (99) في الوقت ده بقى كان (يوسف السباعي) موجود في الكلية في الدفعة اللي قبلنا.

أحمد منصور: اللي هو الروائي المعروف بعد ذلك.

حسين الشافعي: (يوسف السباعي) .

أحمد منصور: الأديب والروائي المعروف.

حسين الشافعي: والصديق، لأنه ده كان زميلَ سلاح، عشنا طول فترة الصحرا دي مع بعض، وله معزَّة ومودَّة كبيرة جدًا، والسلاح بقى كان بيشمل طاقات غربية قوي مختلفة يعني مثلًا من اللي أعتز بيهم (أحمد حافظ مظهر) كان برضه أحد زملاء السلاح، وكان دفعة (جمال عبد الناصر) أيضًا.

أحمد منصور: جمال عبد الناصر جاء في الدفعة اللي بعد كده.

حسين الشافعي: جه في الدفعة، يعني قضى 3 أشهر في كلية الحقوق إلى أن أُعلِن عن دفعة جديدة اسمها دفعة مارس 1937 فدخل فيها.

أحمد منصور: أنت درست مع (جمال عبد الناصر) وتزاملت معه في الكلية رغم أنك كنتَ أقدم منه.

حسين الشافعي: آه.. بس هو كنا إحنا في المتوسط لما كان هو...

أحمد منصور [مقاطعًا] : في الأول.

حسين الشافعي: في الإعدادي، ولكن اتخرجنا في نفس السنة بفارق برضه 6 شهور، واللي هي الفرق بين الدُّفعة دي والدُّفعة دي.

أحمد منصور: مين أيضًا مِن الشخصيات الأخرى التي عُرِفَتْ في الحياة السياسية والعسكرية المصرية زاملك أثناء دراستك في الفترة من 1936م ل 1938م في الكلية الحربية؟

حسين الشافعي: والله طبعًا السيد (زكريا محيي الدين) .

أحمد منصور: نائب رئيس الجمهورية الأسبق وعضو مجلس قيادة الثورة.

حسين الشافعي: و (أنور السادات) يعني من الدُّفعة في المجال العام يمكن ماكنش في حد.. فيه بدرجة سفير وكده..