أرشيف الكتب الإسلامية
فهرس الكتاب

‹
›
الصفحة 2308 من 6343

بتوں کی پوجا

مشرکین مکہ جو بت پرست ہیں اور اپنے آپ کو خلیل اللہ کا متبع خیال کرتے ہیں ، ان کے سامنے اے نبی کریم صلی اللہ علیہ وسلم خود ابراہیم علیہ السلام کا واقعہ بیان کیجئے ۔ اس سچے نبی علیہ السلام نے اپنے باپ کی بھی پرواہ نہ کی اور اس کے سامنے بھی حق کو واضح کر دیا اور اسے بت پرستی سے روکا ۔ صاف کہا کہ کیوں ان بتوں کی پوجا پاٹ کر رہے ہوں جو نہ نفع پہنچا سکیں نہ ضرر ۔ فرمایا کہ میں بیشک آپ کا بچہ ہوں لیکن اللہ کا علم جو میرے پاس ہے آپ کے پاس نہیں ، آپ میری اتباع کیجئے میں آپ کو راہ راست دکھاؤں گا ، برائیوں سے بچا کر بھلائیوں میں پہنچا دوں گا ۔ ابا جی یہ بت پرستی تو شیطان کی تابعداری ہے وہی اس کی راہ سمجھاتا ہے اور وہی اس سے خوش ہوتا ہے ۔ جیسے سورۃ یاسین میں ہے «اَلَمْ اَعْہَدْ اِلَیْکُمْ یٰبَنِیْٓ اٰدَمَ اَنْ لَّا تَعْبُدُوا الشَّیْطٰنَ اِنَّہٗ لَکُمْ عَدُوٌّ مٰبِیْنٌ» ۱؎ (36-یس:60) ، اللہ تعالیٰ فرمائے گا کہ ' اے انسانو ! کیا میں نے تم سے عہد نہیں لیا تھا کہ شیطان کی عبادت نہ کرنا وہ تمہارا کھلا دشمن ہے ' ۔ اور آیت میں ہے «اِنْ یَّدْعُوْنَ مِنْ دُوْنِہٖٓ اِلَّآ اِنَاثًا وَاِنْ یَّدْعُوْنَ اِلَّا شَیْطٰنًا مَّرِیْدًا» ۱؎ (4-النساء:117) ، ' یہ لوگ تو عورتوں کو پکارتے ہیں اور اللہ کو چھوڑتے ہیں دراصل یہ سرکش شیطان کے پکارنے والے ہیں ' ۔

آپ علیہ السلام نے فرمایا " شیطان اللہ کا نافرمان ہے ، مخالف ہے ، اس کی فرمانبرداری سے تکبر کرنے والا ہے ، اسی وجہ سے راندہ درگاہ ہوا ہے اگر تو نے بھی اس کی اطاعت کی تو وہ اپنی حالت پر تجھے بھی پہنچا دے گا " ۔ " ابا جان آپ کے اس شرک و عصیان کی وجہ سے مجھے تو خوف ہے کہ کہیں آپ پر اللہ کا کوئی عذاب نہ آ جائے اور آپ شیطان کے دوست اور اس کے ساتھی نہ بن جائیں اور اللہ کی مدد اور اس کا ساتھ آپ سے چھوٹ نہ جائے ۔ دیکھو شیطان خود بے کس و بے بس ہے اس کی تابعداری آپ کو بری جگہ پہنچا دے گی " ۔ جیسے فرمان باری ہے «تَ اللہِ لَقَدْ أَرْ‌سَلْنَا إِلَیٰ أُمَمٍ مِّن قَبْلِکَ فَزَیَّنَ لَہُمُ الشَّیْطَانُ أَعْمَالَہُمْ فَہُوَ وَلِیٰہُمُ الْیَوْمَ وَلَہُمْ عَذَابٌ أَلِیمٌ» ۱؎ (16-النحل:63) یعنی ' یہ یقینی اور قسمیہ بات ہے کہ تجھ سے پہلے کی امتوں کی طرف بھی ہم نے رسول بھیجے لیکن شیطان نے ان کی بداعمالیاں انہیں مزین کر کے دکھلائیں اور وہی ان کا ساتھی بن گیا لیکن کام کچھ نہ آیا اور قیامت کے دن عذاب الیم میں پھنس گئے ' ۔

حجم الخط:
شارك الصفحة
فضلًا انتظر تحميل الصوت