أرشيف الكتب الإسلامية
فهرس الكتاب

‹
›
الصفحة 4122 من 6343

فیصلے روز قیامت کو ہوں گے

چونکہ مثالوں سے باتیں ٹھیک طور پر سمجھ میں آ جاتی ہیں اس لیے اللہ تعالیٰ قرآن کریم میں ہر قسم کی مثالیں بھی بیان فرماتا ہے تاکہ لوگ سوچ سمجھ لیں ۔ چنانچہ ارشاد ہے «ضَرَبَ لَکُمْ مَّثَلًا مِّنْ اَنْفُسِکُمْ» ۱؎ (30-الروم:28) ' اللہ نے تمہارے لیے وہ مثالیں بیان فرمائی ہیں جنہیں تم خود اپنے آپ میں بہت اچھی طرح جانتے بوجھتے ہو ' ۔ ایک اور آیت میں ہ ے «وَتِلْکَ الْأَمْثَالُ نَضْرِبُہَا لِلنَّاسِ وَمَا یَعْقِلُہَا إِلَّا الْعَالِمُونَ» ۱؎ (29-العنکبوت:43) ' ان مثالوں کو ہم لوگوں کے سامنے بیان کر رہے ہیں علماء ہی انہیں بخوبی سمجھ سکتے ہیں ' ۔ ' یہ قرآن فصیح عربی زبان میں ہے جس میں کوئی کجی اور کوئی کمی نہیں واضح دلیلیں اور روشن حجتیں ہیں ۔ یہ اس لیے کہ اسے پڑھ کر سن کر لوگ اپنا بچاؤ کر لیں ۔ اس کے عذاب کی آیتوں کو سامنے رکھ کر برائیاں چھوڑیں اور اس کے ثواب کی آیتوں کی طرف نظریں رکھ کر نیک اعمال میں محنت کریں ' ۔ اس کے بعد جناب باری عزاسمہ موحد اور مشرک کی مثال بیان فرماتا ہے کہ ' ایک تو وہ غلام جس کے مالک بہت سارے ہوں اور وہ بھی آپس میں ایک دوسرے کے مخالف ہوں اور دوسرا وہ غلام جو خالص صرف ایک ہی شخص کی ملکیت کا ہو اس کے سوا اس پر دوسرے کسی کا کوئی اختیار نہ ہو ۔ کیا یہ دونوں تمہارے نزدیک یکساں ہیں ؟ ہرگز نہیں ' ۔ اسی طرح موحد جو صرف ایک « اللہُ وَحدَہُ لَا شَرِیْکَ لَہُ» کی ہی عبادت کرتا ہے ۔ اور مشرک جس نے اپنے معبود بہت سے بنا رکھے ہیں ۔ ان دونوں میں بھی کوئی نسبت نہیں ۔ کہاں یہ مخلص موحد ؟ کہاں یہ در بہ در بھٹکنے والا مشرک ؟ اس ظاہر باہر روشن اور صاف مثال کے بیان پر بھی رب العالمین کی حمد و ثنا کرنی چاہیئے کہ اس نے اپنے بندوں کو اس طرح سمجھا دیا کہ معاملہ بالکل صاف ہو جائے ۔ شرک کی بدی اور توحید کی خوبی ہر ایک کے ذہن میں آ جائے ۔ اب رب کے ساتھ وہی شرک کریں گے جو محض بےعلم ہوں جن میں سمجھ بوجھ بالکل ہی نہ ہو ۔ اس کے بعد کی آیت کو سیدنا ابوبکر صدیق رضی اللہ عنہا نے نبی کریم صلی اللہ علیہ وسلم کے انتقال کے بعد پڑھ کر پھر دوسری آیت «وَمَا مُحَمَّدٌ إِلَّا رَسُولٌ قَدْ خَلَتْ مِن قَبْلِہِ الرٰسُلُ ۚ أَفَإِن مَّاتَ أَوْ قُتِلَ انقَلَبْتُمْ عَلَیٰ أَعْقَابِکُمْ وَمَن یَنقَلِبْ عَلَیٰ عَقِبَیْہِ فَلَن یَضُرَّ اللہَ شَیْئًا وَسَیَجْزِی اللہُ الشَّاکِرِینَ» ۱؎ (3-آل عمران:144) کی آخر آیت تک تلاوت کر کے لوگوں کو بتایا تھا ۔ مطلب آیت شریفہ کا یہ ہے کہ ' سب اس دنیا سے جانے والے ہیں اور آخرت میں اپنے رب کے پاس جمع ہونے والے ہیں ۔ وہاں اللہ تعالیٰ مشرکوں اور موحدوں میں صاف فیصلہ کر دے گا اور حق ظاہر ہو جائے گا ۔ اس سے اچھے فیصلے والا اور اس سے زیادہ علم والا کون ہے ؟ ایمان اخلاص اور توحید و سنت والے نجات پائیں گے ۔ شرک و کفر انکار و تکذیب والے سخت سزائیں اٹھائیں گے ' ۔ اسی طرح جن دو شخصوں میں جو جھگڑا اور اختلاف دنیا میں تھا روز قیامت وہ اللہ عادل کے سامنے پیش ہو کر فیصلہ ہو گا ۔ { اس آیت کے نازل ہونے پر سیدنا زبیر رضی اللہ عنہ نے رسول اللہ صلی اللہ علیہ وسلم سے سوال کیا کہ قیامت کے دن پھر سے جھگڑے ہوں گے ؟ آپ صلی اللہ علیہ وسلم نے فرمایا: ہاں یقیناً } تو عبداللہ نے کہا پھر تو سخت مشکل ہے ۔ (ابن ابی حاتم)

مسند احمد کی اس حدیث میں یہ بھی ہے کہ { آیت «ثُمَّ لَتُسْـَٔــلُنَّ یَوْمَیِٕذٍ عَنِ النَّعِیْمِ» ۱؎ (102-التکاثر:8) یعنی ' پھر اس دن تم سے اللہ کی نعمتوں کا سوال کیا جائے گا ' ، کے نازل ہونے پر آپ رضی اللہ عنہ ہی نے سوال کیا کہ " وہ کون سی نعمتیں ہیں جن کی بابت ہم سے حساب لیا جائے گا ؟ ہم تو کھجوریں کھا کر اور پانی پی کر گزارہ کر رہے ہیں " ۔ نبی کریم صلی اللہ علیہ وسلم نے فرمایا: اب نہیں ہیں تو عنقریب بہت سی نعمتیں ہو جائیں گی } ۔ (سنن ترمذی:3236،قال الشیخ الألبانی:حسن الاسناد) ۔ یہ حدیث ترمذی اور ابن ماجہ میں بھی ہے اور امام ترمذی رحمتہ اللہ علیہ اسے حسن بتاتے ہیں ۔ مسند کی اسی حدیث میں یہ بھی ہے کہ { زبیر بن عوام رضی اللہ عنہ نے آیت «اِنَّکَ مَیِّتٌ وَّاِنَّہُمْ مَّیِّتُوْنَ» ۱؎ (39-الزمر:30) کے نازل ہونے پر پوچھا کہ یا رسول اللہ صلی اللہ علیہ وسلم کیا جو جھگڑے ہمارے دنیا میں تھے وہ دوبارہ وہاں قیامت میں دوہرائے جائیں گے ؟ ساتھ ہی گناہوں کی بھی پرستش ہوگی ۔ آپ صلی اللہ علیہ وسلم نے فرمایا: ہاں وہ ضرور دوہرائے جائیں گے ۔ اور ہر شخص کو اس کا حق پورا پورا دلوایا جائے گا } ۔ تو آپ رضی اللہ عنہ نے کہا پھر تو سخت مشکل کام ہے ۔ ۱؎ (سنن ترمذی:3236،قال الشیخ الألبانی:حسن) مسند احمد میں ہے رسول اللہ صلی اللہ علیہ وسلم فرماتے ہیں { سب سے پہلے پڑوسیوں کے آپس میں جھگڑے پیش ہوں گے } (مسند احمد:151/4:حسن) ۔ اور حدیث میں ہے { اس ذات پاک کی قسم جس کے ہاتھ میں میری جان ہے کہ سب جھگڑوں کا فیصلہ قیامت کے دن ہو گا ۔ یہاں تک کہ دوبکریاں جو لڑی ہوں گی اور ایک نے دوسری کو سینگ مارے ہوں گے ان کا بدلہ بھی دلوایا جائے گا } ۔ ۱؎ (مسند احمد:29/3:حسن لغیرہ)

مسند ہی کی ایک اور حدیث میں ہے کہ { دو بکریوں کو آپس میں لڑتے ہوئے دیکھ کر رسول اللہ صلی اللہ علیہ وسلم نے سیدنا ابوذر رضی اللہ عنہا سے دریافت فرمایا کہ جانتے ہو یہ کیوں لڑ رہی ہیں ؟ } سیدنا ابوذر رضی اللہ عنہا نے جواب دیا کہ نبی کریم صلی اللہ علیہ وسلم مجھے کیا خبر ؟ آپ صلی اللہ علیہ وسلم نے فرمایا: { ٹھیک ہے ۔ لیکن اللہ تعالیٰ کو اس کا علم ہے اور وہ قیامت کے دن ان میں بھی انصاف کرے گا } ۔۱؎ (مسند احمد:162/5:حسن) مسند بزار میں ہے { رسول اللہ صلی اللہ علیہ وسلم فرماتے ہیں ظالم اور خائن بادشاہ سے اس کی رعیت قیامت کے دن جھگڑا کرے گی اور اس پر وہ غالب آ جائے گی اور اللہ کا فرمان صادر ہو گا کہ جاؤ اسے جہنم کا ایک رکن بنا دو } ۔ ۱؎ (مسند بزار:1644:ضعیف) اس حدیث کے ایک راوی اغلب بن تمیم کا حافظہ جیسا چاہیئے ایسا نہیں ۔ سیدنا عبداللہ بن عباس رضی اللہ عنہ فرماتے ہیں " ہر سچا جھوٹے سے ، ہر مظلوم ظالم سے ، ہر ہدایت والا گمراہی والے سے ، ہر کمزور زورآور سے اس روز جھگڑے گا " ۔ ابن مندہ رحمتہ اللہ اپنی کتاب الروح میں سیدنا ابن عباس رضی اللہ عنہ سے روایت لائے کہ " لوگ قیامت کے دن جھگڑیں گے یہاں تک کہ روح اور جسم کے درمیان بھی جھگڑا ہوگا ۔ روح تو جسم کو الزام دے گی کہ تونے یہ سب برائیاں کیں اور جسم روح سے کہے گا ساری چاہت اور شرارت تیری ہی تھی ۔ ایک فرشتہ ان میں فیصلہ کرے گا کہے گا سنو! ایک آنکھوں والا انسان ہے لیکن اپاہج بالکل لولا لنگڑا چلنے پھرنے سے معذور ۔ دوسرا آدمی اندھا ہے لیکن اسکے پیر سلامت ہیں چلتا پھرتا ہے دونوں ایک باغ میں ہیں۔ لنگڑا اندھے سے کہتا ہے بھائی یہ باغ تو میووں اور پھلوں سے لدا ہوا ہے۔ لیکن میرے تو پاؤں نہیں جو میں جاکر یہ پھل توڑ لوں۔ اندھا کہتا ہے آ میرے پاؤں ہیں میں تجھے اپنی پیٹھ پر چڑھا لیتا ہوں اور لے چلتا ہوں۔ چنانچہ یہ دونوں اس طرح پہنچے اور جی کھول کر پھل توڑے ، بتاؤ ان دونوں میں مجرم کون ہے؟ جسم و روح دونوں جواب دیتے ہیں کہ جرم دونوں کا ہے ۔ فرشتہ کہتا ہے بس اب تو تم نے اپنا فیصلہ آپ کردیا ۔ یعنی جسم گویا سواری ہے اور روح اس پر سوار ہے " ۔

ابن ابی حاتم میں ہے عبداللہ بن عمر رضی اللہ عنہ فرماتے ہیں کہ " اس آیت کے نازل ہونے پر ہم تعجب میں تھے کہ ہم میں اور اہل کتاب میں تو جھگڑا ہے ہی نہیں پھر آخر روز قیامت میں کس سے جھگڑے ہوں گے ؟ اس کے بعد جب آپس کے فتنے شروع ہو گئے تو ہم نے سمجھ لیا کہ یہی آپس کے جھگڑے ہیں جو اللہ کے ہاں پیش ہوں گے " ۔ ابوالعالیہ رحمتہ اللہ علیہ فرماتے ہیں اہل قبلہ غیر اہل قبلہ سے جھگڑیں گے اور ابن زید رحمتہ اللہ علیہ سے مروی ہے کہ مراد اہل اسلام اور اہل کفر کا جھگڑا ہے ۔ لیکن ہم پہلے ہی بیان کر چکے ہیں کہ فی الواقع یہ آیت عام ہے ۔ «وَاللہُ سُبْحَانَہُ وَ تَعَالیٰ اَعْلَمُ» ۔

«اَلْحَمْدُ لِلہِ» ! اللہ تعالیٰ کے لطف و کرم اور فضل و رحم سے تفسیر محمدی کا تیسواں ( ۲۳ ) پارہ ختم ہوا ۔ اللہ تعالیٰ اسے قبول فرمائے اور ہماری تقصیر کی معافی کا سبب اس تفسیر کو بنا دے ۔ ہمیں اپنے پاک کلام کی تلاوت کا ذوق ، اس کے معنی کے سمجھنے کا شوق عطا فرمائے ، علم و عمل کی توفیق دے ، عذاب سے نجات دے ، جنت الفردوس میں جگہ عطا فرمائے ۔ آمین !

حجم الخط:
شارك الصفحة
فضلًا انتظر تحميل الصوت