أرشيف الكتب الإسلامية
فهرس الكتاب

‹
›
الصفحة 5204 من 6343

بلند و عظیم مرتبہ قرآن مجید

قرآن کریم کی بزرگی بیان ہو رہی ہے کہ فی الواقع یہ پاک کتاب اس قدر بلند مرتبہ ہے کہ دل اس کے سامنے جھک جائیں ، رونگٹے کھڑے ہو جائیں ، کلیجے کپکپائیں ، اس کے سچے وعدے اور اس کی حقانی ڈانٹ ڈپٹ ہر سننے والے کو بید کی طرح تھرا دے ، اور دربار اللہ میں سر بسجود کرا دے ، اگر یہ قرآن جناب باری کسی سخت بلند اور اونچے پہاڑ پر بھی نازل فرماتا اور اسے غور و فکر اور فہم و فراست کی حس بھی دیتا تو وہ بھی اللہ کے خوف سے ریزہ ریزہ ہو جاتا ، پھر انسانوں کے دلوں پر جو نسبتاً بہت نرم اور چھوٹے ہیں ۔ جنہیں پوری سمجھ بوجھ ہے ، اس کا بہت بڑا اثر پڑنا چاہیئے ۔ ان مثالوں کو لوگوں کے سامنے ان کے غور و فکر کے لیے اللہ تعالیٰ نے بیان فرما دیا ، مطلب یہ ہے کہ انسانوں کو بھی ڈر اور عاجزی چاہیئے ۔ متواتر حدیث میں ہے کہ منبر تیار ہونے سے پہلے رسول اللہ صلی اللہ علیہ وسلم ایک کھجور کے تنے پر ٹیک لگا کر خطبہ پڑھا کرتے تھے جب منبر بن گیا ، بچھ گیا اور نبی کریم صلی اللہ علیہ وسلم اس پر خطبہ پڑھنے کو کھڑے ہوئے اور وہ تنا دور ہو گیا ، تو اس میں سے رونے کی آواز آنے لگی اور اس طرح سسکیاں لے لے کر وہ رونے لگا جیسے کوئی بچہ بلک بلک کر روتا ہو اور اسے چپ کرایا جا رہا ہو کیونکہ وہ ذکر وحی کے سننے سے کچھ دور ہو گیا تھا ۔ ۱؎ (طبرانی کبیر:60/1)

امام بصریٰ رحمہ اللہ اس حدیث کو بیان کر کے فرماتے تھے کہ "لوگو ایک کھجور کا تنا اس قدر اللہ کے رسول صلی اللہ علیہ وسلم کا شائق ہو تو تمہیں چاہیئے کہ اس سے بہت زیادہ شوق اور چاہت تم رکھو ۔ "۱؎ (صحیح بخاری:3583) اسی طرح کی یہ آیت ہے «لَوْ أَنزَلْنَا ہٰذَا الْقُرْآنَ عَلَیٰ جَبَلٍ لَّرَأَیْتَہُ خَاشِعًا» ۱؎ (59-الحشر:21) کہ ' جب ایک پہاڑ کا یہ حال ہو تو تمہیں چاہیئے کہ تم تو اس حالت میں اس سے آگے رہو۔ ' اور جگہ فرمانِ اللہ سبحانہ و تعالیٰ ہے «وَلَوْ أَنَّ قُرْآنًا سُیِّرَتْ بِہِ الْجِبَالُ أَوْ قُطِّعَتْ بِہِ الْأَرْضُ أَوْ کُلِّمَ بِہِ الْمَوْتَیٰ» ۱؎ (13-الرعد:31) یعنی ' اگر کوئی قرآن ایسا ہوتا کہ اس کے باعث پہاڑ چلا دیئے جائیں یا زمین کاٹ دی جائے یا مردے بول پڑیں ' [ تو اس کے قابل یہی قرآن تھا ، مگر پھر بھی ان کفار کو ایمان نصیب نہ ہوتا ] ۔ اور جگہ فرمان عالی شان ہے «وَإِنَّ مِنَ الْحِجَارَۃِ لَمَا یَتَفَجَّرُ مِنْہُ الْأَنْہَارُ وَإِنَّ مِنْہَا لَمَا یَشَّقَّقُ فَیَخْرُجُ مِنْہُ الْمَاءُ وَإِنَّ مِنْہَا لَمَا یَہْبِطُ مِنْ خَشْیَۃِ اللہِ وَمَا اللہُ بِغَافِلٍ عَمَّا تَعْمَلُونَ » ۱؎ (2-البقرۃ:74) ، یعنی ' بعض پتھر ایسے ہیں جن میں سے نہریں بہہ نکلتی ہیں ، بعض وہ ہیں کہ پھٹ جاتے ہیں اور ان میں سے پانی نکلتا ہے ، بعض اللہ کے خوف سے گر پڑتے ہیں ۔' پھر فرماتا ہے اللہ تعالیٰ کے سوا نہ تو کوئی پالنے اور پرورش کرنے والا ہے ، نہ اس کے سوا کسی کی ایسی نشانیاں ہیں کہ اس کی کسی قسم کی عبادت کوئی کرے اس کے سوا جن جن کی لوگ پرستش اور پوجا کرتے ہیں وہ سب باطل ہیں ، وہ تمام کائنات کا علم رکھنے والا ہے ، جو چیزیں ہم پر ظاہر ہیں اور جو چیزیں ہم سے پوشیدہ ہیں سب اس پر عیاں ہیں ، خواہ آسمان میں ہوں، خواہ زمین میں ہوں ، خواہ چھوٹی ہوں ، خواہ بڑی ہوں ، یہاں تک کہ اندھیریوں کے ذرے بھی اس پر ظاہر ہیں ، وہ اتنی بڑی وسیع رحمت والا ہے کہ اس کی رحمت تمام مخلوق پر محیط ہے ، وہ دنیا اور آخرت میں رحمان بھی ہے اور رحیم بھی ہے ۔ ہماری تفسیر کے شروع میں ان دونوں ناموں کی پوری تفسیر گزر چکی ہے ۔ قرآن کریم میں اور جگہ ہے «وَرَحْمَتِی وَسِعَتْ کُلَّ شَیْءٍ» ۱؎ (7-الأعراف:156) یعنی ' میری رحمت نے تمام چیزوں کو گھیر لیا ہے۔ ' اور جگہ فرمان ہے «کَتَبَ رَبٰکُمْ عَلَیٰ نَفْسِہِ الرَّحْمَۃَ» ۱؎ (6-الأنعام:54) یعنی ' تمہارے رب نے اپنی ذات پر رحم و رحمت لکھ لی ہے ۔' اور فرمان ہے «قُلْ بِفَضْلِ اللہِ وَبِرَحْمَتِہِ فَبِذٰلِکَ فَلْیَفْرَحُوا ہُوَ خَیْرٌ مِّمَّا یَجْمَعُونَ» ۱؎ (10-یونس:58) ' کہدو کہ اللہ تعالیٰ کے فضل و رحمت کے ساتھ ہی خوش ہونا چاہیئے تمہاری جمع کردہ چیز سے بہتر یہی ہے ۔ '

حجم الخط:
شارك الصفحة
فضلًا انتظر تحميل الصوت