أرشيف الكتب الإسلامية
فهرس الكتاب

‹
›
الصفحة 6160 من 6343

مومن کی منزل اللہ تعالیٰ کی رضا

یعنی ' حلال و حرام کا ظاہر کر دینا ہمارے ذمہ ہے ' ، یہ بھی معنی ہیں کہ ' جو ہدایت پر چلا وہ یقیناً ہم تک پہنچ جائیگا ' ۔ جیسے فرمایا «وَعَلَی اللہِ قَصْدُ السَّبِیلِ» ۱؎ (16-النحل:9) ' آخرت اور دنیا کی ملکیت ہماری ہی ہے ' ۔ ' میں نے بھڑکتی ہوئی آگ سے تمہیں ہوشیار کر دیا ہے ' ۔ مسند احمد میں ہے کہ { سیدنا نعمان بن بشیر رضی اللہ عنہ نے اپنے خطبہ میں فرمایا کہ رسول اللہ صلی اللہ علیہ وسلم سے میں نے خطبہ کی حالت میں سنا ہے آپ صلی اللہ علیہ وسلم بہت بلند آواز سے فرما رہے تھے یہاں تک کہ میری اس جگہ سے بازار تک آواز پہنچے اور باربار فرماتے جاتے تھے " لوگو ! میں تمہیں جہنم کی آگ سے ڈرا چکا ۔ لوگو ! میں تمہیں جہنم کی آگ سے ڈرا رہا ہوں " ، باربار یہ فرما رہے تھے یہاں تک کہ چادر مبارک کندھوں سے سرک کر پیروں میں گر پڑی } ۔ (مسند احمد:272/4:حسن) صحیح بخاری شریف میں ہے { رسول اللہ صلی اللہ علیہ وسلم نے فرمایا: " سب سے ہلکے عذاب والا جہنمی قیامت کے دن وہ ہو گا جس کے دونوں قدموں تلے دو انگارے رکھ دئیے جائیں جس سے اس کا دماغ ابل رہا ہو " } ۔ (صحیح بخاری:6561)

مسلم شریف کی حدیث میں ہے { ہلکے عذاب والا ہے جہنمی ہو گا جس کی دونوں جوتیاں اور دونوں تسمے آگ کے ہوں گے جن سے اس کا دماغ اس طرح ابل رہا وہ گا جس طرح ہنڈیا جوش کھا رہی ہو باوجود یہ کہ سب سے ہلکے عذاب والا یہی ہے لیکن اس کے خیال میں اس سے زیادہ عذاب والا اور کوئی نہ ہو گا } ۔ (صحیح مسلم:213) اس جہنم میں صرف وہی لوگ گھیر گھار کر بدترین عذاب کیے جائیں گے جو بدبخت تر ہوں جن کے دل میں کذب بغض ہو اور اسلام پر عمل نہ ہو ۔ مسند احمد کی حدیث میں بھی ہے کہ { جہنم میں صرف شقی لوگ جائیں گے ۔ لوگوں نے پوچھا وہ کون ہیں ؟ فرمایا: " جو اطاعت گزار نہ ہوں اور نہ اللہ کے خوف سے کوئی بدی چھوڑتا ہو " } ۔ (مسند احمد:349/2:ضعیف) مسند کی اور حدیث میں ہے { میری ساری امت جنت میں جائیگی سوائے اس کے جو جنت میں جانے سے انکار کریں ، لوگوں نے پوچھا جنت میں جانے سے انکار کرنے والا کون ہے ؟ فرمایا: جو میری اطاعت کرے وہ جنت میں گیا اور جس نے میری نافرمانی کی اس نے گویا جنت میں جانے سے انکار کر دیا } ۔ (صحیح بخاری:7280) اور فرمایا ' جہنم سے دوری اسے ہو گی جو تقویٰ شعار ، پرہیزگار اور اللہ کے ڈر والا ہو گا جو اپنے مال کو اللہ کی راہ میں دے تاکہ خود بھی پاک ہو جائے اور اپنی چیزوں کو بھی پاک کر لے اور دین دنیا میں پاکیزگی حاصل کر لے کیونکہ یہ شخص اس کے لیے کسی کے ساتھ سلوک نہیں کرتا کہ اس کا کوئی احسان اس پر ہے بلکہ اس لیے کہ آخرت میں جنت ملے اور وہاں اللہ کا دیدار نصیب ہو ' ۔ پھر فرماتا ہے کہ ' بہت جلد بالیقین ایسی پاک صفتوں والا شخص راضی ہو جائے گا ' ۔

اکثر مفسرین کہتے ہیں یہ آیتیں سیدنا ابوبکر صدیق رضی اللہ عنہ کے بارے میں اتری ہیں یہاں تک کہ بعض مفسرین نے تو اس پر اجماع نقل کیا ہے بے شک سیدنا صدیق اکبر رضی اللہ عنہ اس میں داخل ہیں اور اس کی عمومیت میں ساری امت سے پہلے ہیں گو الفاظ آیت کے عام ہیں لیکن آپ سے اول اس کے مصداق ہیں ان تمام اوصاف میں اور کل کی کل نیکیوں میں سب سے پہلے اور سب سے آگے اور سب سے بڑھے چڑھے ہوئے آپ ہی تھے ۔ آپ صدیق تھے ، پرہیزگار تھے ، بزرگ تھے ، سخی تھے ۔ آپ مالوں کو اپنے مولا کی اطاعت میں اور رسول اللہ صلی اللہ علیہ وسلم کی امداد میں دل کھول کر خرچ کرتے رہتے تھے ہر ایک کے ساتھ احسان و سلوک کرتے اور کسی دنیوی فائدے کی چاہت پر نہیں کسی کے احسان کے بدلے نہیں بلکہ صرف اللہ کی مرضی کے لیے رسول اللہ صلی اللہ علیہ وسلم کی فرمانبرداری کے لیے جتنے لوگ تھے خواہ بڑے ہوں خواہ چھوٹے سب پر سیدنا صدیق اکبر رضی اللہ عنہ کے احسانات کے بار تھے یہاں تک کہ سیدنا عروہ بن مسعود رضی اللہ عنہما جو قبیلہ ثقیف کا سردار تھا صلح حدیبیہ کے موقعہ پر جبکہ صدیق رضی اللہ عنہما نے اسے ڈانٹا ڈپٹا اور دو باتیں سنائیں تو اس نے کہا کہ اگر آپ کے احسان مجھ پر نہ ہوتے جس کا بدلہ میں نہیں دے سکا تو میں آپ کو ضرور جواب دیتا ۔ (صحیح بخاری:2731) پس جبکہ عرب کے سردار اور قبائل عرب کے بادشاہ کے اوپر آپ کے اس قدر احسان تھے کہ وہ سر نہیں اٹھا سکتا تھا تو بھلا اور تو کہاں ؟ اسی لیے یہاں بھی فرمایا گیا کہ ' کسی پر احسان کا بدلہ انہیں دینا نہیں بلکہ صرف دیدار اللہ کی خواہش ہے ' ۔ بخاری و مسلم کی حدیث میں ہے جو شخص جوڑا اللہ کی راہ میں خرچ کرے اسے جنت کے داروغے پکاریں گے کہ " اے اللہ کے بندے ادھر سے آؤ یہ سب سے اچھا ہے " ، تو سیدنا ابوبکر رضی اللہ عنہ نے فرمایا یا رسول اللہ ! کوئی ضرورت تو ایسی نہیں لیکن فرمائیے تو کیا کوئی ایسا بھی ہے جو جنت کے تمام دروازوں سے بلایا جائے ؟ آپ صلی اللہ علیہ وسلم نے فرمایا: " ہاں ہے اور مجھے اللہ سے امید ہے کہ تم ان میں سے ہو " ۔ (صحیح بخاری:1897) «اَلْحَمْدُ لِلہِ» سورۃ اللیل کی تفسیر ختم ہوئی ۔ اللہ کا احسان ہے اور اس کا شکر ہے ۔

حجم الخط:
شارك الصفحة
فضلًا انتظر تحميل الصوت