أرشيف الكتب الإسلامية
فهرس الكتاب

‹
›
الصفحة 2499 من 6343

قرآن حکیم سب سے بڑا معجزہ

کفار یہ بھی کہا کرتے تھے کہ آخر کیا وجہ ہے کہ یہ نبی اپنی سچائی کا کوئی معجزہ ہمیں نہیں دکھاتے ؟ جواب ملتا ہے کہ یہ ہے قرآن کریم جو اگلی کتابوں کی خبر کے مطابق اللہ تعالیٰ نے اپنے نبی امی صلی اللہ علیہ وسلم پر اتارا ہے ، جو نہ لکھنا جانیں نہ پڑھنا ۔ دیکھ لو اس میں اگلے لوگوں کے حالات ہیں اور بالکل ان کتابوں کے مطابق جو اللہ کی طرف سے اس سے پہلے نازل شدہ ہیں ۔ قرآن ان سب کا نگہبان ہے ۔ چونکہ اگلی کتابیں کمی بیشی سے پاک نہیں رہیں ، اس لیے قرآن اترا ہے کہ ان کی صحت و غیر صحت کو ممتاز کر دے ۔ سورۃ العنکبوت میں کافروں کے اس اعتراض کے جواب میں فرمایا «وَقَالُوا لَوْلَا أُنزِلَ عَلَیْہِ آیَاتٌ مِّن رَّبِّہِ ۖ قُلْ إِنَّمَا الْآیَاتُ عِندَ اللہِ وَإِنَّمَا أَنَا نَذِیرٌ مٰبِینٌ * أَوَلَمْ یَکْفِہِمْ أَنَّا أَنزَلْنَا عَلَیْکَ الْکِتَابَ یُتْلَیٰ عَلَیْہِمْ ۚ إِنَّ فِی ذٰلِکَ لَرَحْمَۃً وَذِکْرَیٰ لِقَوْمٍ یُؤْمِنُونَ» ۱؎ (29-العنکبوت:50-51) ' یعنی کہہ دے کہ اللہ تعالیٰ رب العالمین ہر قسم کے معجزات ظاہر کرنے پر قادر ہے ، میں تو صرف تنبیہہ کرنے والا رسول ہوں ۔ میرے قبضے میں کوئی معجزہ نہیں لیکن کیا انہیں یہ معجزہ کافی نہیں کہ ہم نے تجھ پر کتاب نازل فرمائی ہے جو ان کے سامنے برابر تلاوت کی جا رہی ہے جس میں ہر یقین والے کے لیے رحمت و عبرت ہے ۔ ' صحیح بخاری و مسلم میں { رسول اللہ صلی اللہ علیہ وسلم فرماتے ہیں ، ہرنبی کو ایسے معجزے ملے کہ انہیں دیکھ کر لوگ ان کی نبوت پر ایمان لے آئے ۔ لیکن مجھے جیتا جاگتا زندہ اور ہمیشہ رہنے والا معجزہ دیا گیا ہے یعنی اللہ کی یہ کتاب قرآن مجید جو بذریعہ وحی مجھ پر اتری ہے ۔ پس مجھے امید ہے کہ قیامت کے دن تمام نبیوں کے تابعداروں سے میرے تابعدار زیادہ ہوں گے ۔ } ۱؎ (صحیح بخاری:4981) یہ یاد رہے کہ یہاں رسول اللہ صلی اللہ علیہ وسلم کا سب سے بڑا معجزہ بیان ہوا ہے اس سے یہ مطلب نہیں کہ آپ کے معجزے اور تھے ہی نہیں ۔ علاوہ اس پاک اور معجز قرآن کے آپ کے ہاتھوں اس قدر معجزات سرزد ہوئے ہیں جو گنتی میں نہیں آ سکتے ۔ لیکن ان تمام بےشمار معجزوں سے بڑھ چڑھ کر آپ کا سب سے اعلیٰ معجزہ یہ قرآن کریم ہے ۔ اگر اس محترم ختم المرسلین آخری پیغمبر صلی اللہ علیہ وسلم کو بھیجنے سے پہلے ہی ہم ان نہ ماننے والوں کو اپنے عذاب سے ہلاک کر دیتے تو ان کا یہ عذر باقی رہ جاتا کہ اگرہمارے سامنے کوئی پیغمبر آتا ، کوئی وحی الٰہی نازل ہوتی تو ہم ضرور اس پر ایمان لاتے اور اس کی تابعداری اور فرماں برداری میں لگ جاتے اور اس ذلت و رسوائی سے بچ جاتے ۔ اس لیے ہم نے ان کا یہ عذر بھی کاٹ دیا ۔ رسول بھیج دیا ، کتاب نازل فرما دی ، انہیں ایمان نصیب نہ ہوا ، عذابوں کے مستحق بن گئے اور عذر بھی دور ہو گئے ۔ «وَلَوْ جَاءَتْہُمْ کُلٰ آیَۃٍ حَتَّیٰ یَرَوُا الْعَذَابَ الْأَلِیمَ » ۱؎ (10-یونس:97) ' ہم خوب جانتے ہیں کہ ایک کیا ہزاروں آیتیں اور نشانات دیکھ کر بھی انہیں ایمان نہیں آنے کا ۔ ہاں جب عذابوں کو اپنی آنکھوں سے دیکھ لیں گے ، اس وقت ایمان لائیں گے لیکن وہ محض بےسود ہے ۔ '

ّجیسے فرمایا ، «وَہٰذَا کِتَابٌ أَنزَلْنَاہُ مُبَارَکٌ فَاتَّبِعُوہُ وَاتَّقُوا لَعَلَّکُمْ تُرْحَمُونَ» ۱؎ (6-الأنعام:155) ' ہم نے یہ پاک اور بہتر کتاب نازل فرما دی ہے جو بابرکت ہے ، تم اسے مان لو اور اس کی فرماں برداری کرو تو تم پر رحم کیا جائے گا ۔ ' یہی مضمون آیت «وَأَقْسَمُوا بِ اللہِ جَہْدَ أَیْمَانِہِمْ لَئِن جَاءَتْہُمْ آیَۃٌ لَّیُؤْمِنُنَّ بِہَا ۚ قُلْ إِنَّمَا الْآیَاتُ عِندَ اللہِ ۖ وَمَا یُشْعِرُکُمْ أَنَّہَا إِذَا جَاءَتْ لَا یُؤْمِنُونَ وَنُقَلِّبُ أَفْئِدَتَہُمْ وَأَبْصَارَہُمْ کَمَا لَمْ یُؤْمِنُوا بِہِ أَوَّلَ مَرَّۃٍ وَنَذَرُہُمْ فِی طُغْیَانِہِمْ یَعْمَہُونَ » ۱؎ (6-الأنعام:109) میں ہے کہ کہتے ہیں کہ رسول کی آمد پر ہم مومن بن جائیں گے ، معجزہ دیکھ کر ایمان قبول کر لیں گے لیکن ہم ان کی سرشت سے واقف ہیں ، یہ تمام آیتیں دیکھ کر بھی ایمان نہ لائیں گے ۔ پھر ارشاد ہوتا ہے کہ اے نبی کریم صلی اللہ علیہ وسلم ! ان کافروں سے کہہ دیجئیے کہ ادھر ہم ادھر تم منتظر ہیں ۔ «وَسَوْفَ یَعْلَمُونَ حِینَ یَرَوْنَ الْعَذَابَ مَنْ أَضَلٰ سَبِیلًا» (25-الفرقان:42) ' ابھی حال کھل جائے گا کہ راہ مستقیم پر کون ہے ؟ ' حق کی طرف کون چل رہا ہے ؟ عذابوں کو دیکھتے ہی آنکھیں کھل جائیں گی ۔ اس وقت معلوم ہو جائے گا کون گمراہی میں مبتلا تھا ۔ گھبراؤ نہیں ۔ ابھی ابھی جان لو گے کہ «سَیَعْلَمُونَ غَدًا مَّنِ الْکَذَّابُ الْأَشِرُ » ۱؎ (54-القمر:26) کذاب و شریر کون تھا ؟ یقیناً مسلمان راہ راست پر ہیں اور غیرمسلم اس سے ہٹے ہوئے ہیں ۔ سورۃ طہ کی تفسیر ختم ہوئی ۔ اور اسی کے ساتھ تفسیر محمدی کا سولہواں پارہ بھی ختم ہوا ، «فالْحَمْدُ لِلّٰہ»

حجم الخط:
شارك الصفحة
فضلًا انتظر تحميل الصوت