أرشيف الكتب الإسلامية
فهرس الكتاب

‹
›
الصفحة 4096 من 6343

باطل عقائد کی تردید

اللہ تبارک و تعالیٰ خبر دیتا ہے کہ ' یہ قرآن عظیم اسی کا کلام ہے اور اسی کا اتارا ہوا ہے ۔ اس کے حق ہونے میں کوئی شک و شبہ نہیں ' ۔ جیسے اور جگہ ہے « وَإِنَّہُ لَتَنزِیلُ رَ‌بِّ الْعَالَمِینَ نَزَلَ بِہِ الرٰوحُ الْأَمِینُ عَلَیٰ قَلْبِکَ لِتَکُونَ مِنَ الْمُنذِرِ‌ینَ بِلِسَانٍ عَرَ‌بِیٍّ مٰبِینٍ» ۱؎ (26-الشعراء:195-192) ، ' یہ رب العالمین کی طرف سے نازل کیا ہوا ہے ۔ جسے روح الامین لے کر اترا ہے ۔ تیرے دل پر اترا ہے تاکہ تو آگاہ کرنے والابن جائے ۔ صاف فصیح عربی زبان میں ہے ' اور آیتوں میں ہے «إِنَّ الَّذِینَ کَفَرُ‌وا بِالذِّکْرِ‌ لَمَّا جَاءَہُمْ وَإِنَّہُ لَکِتَابٌ عَزِیزٌ لَّا یَأْتِیہِ الْبَاطِلُ مِن بَیْنِ یَدَیْہِ وَلَا مِنْ خَلْفِہِ تَنزِیلٌ مِّنْ حَکِیمٍ حَمِیدٍ» ۱؎ (41-فصلت:41-42) ' یہ باعزت کتاب وہ ہے جس کے آگے یا پیچھے سے باطل آ ہی نہیں سکتا یہ حکمتوں والی تعریفوں والے اللہ کی طرف سے اتری ہے ' ۔ یہاں فرمایا کہ ' یہ کتاب بہت بڑے عزت والے اور حکمت والے اللہ کی طرف سے اتری ہے جو اپنے اقوال افعال شریعت تقدیر سب میں حکمتوں والا ہے ۔ ہم نے تیری طرف اس کتاب کو حق کے ساتھ نازل فرمایا ہے ۔ تجھے چاہیئے کہ خود اللہ کی عبادتوں میں اور اس کی توحید میں مشغول رہ کر ساری دنیا کو اسی طرف بلا ، کیونکہ اس اللہ کے سوا کسی کی عبادت زیبا نہیں ، وہ لاشریک ہے ، وہ بے مثال ہے ، اس کا شریک کوئی نہیں ۔ دین خالص یعنی شہادت توحید کے لائق وہی ہے ' ۔

پھر مشرکوں کا ناپاک عقیدہ بیان کیا کہ ' وہ فرشتوں کو اللہ کا مرقب جان کر ان کی خیالی تصویریں بنا کر ان کی پوجا پاٹ کرنے لگے یہ سمجھ کر یہ اللہ کے لاڈلے ہیں ، ہمیں جلدی اللہ کا مقرب بنا دیں گے ۔ پھر تو ہماری روزیوں میں اور ہرچیز میں خوب برکت ہو جائے گی ' ۔ یہ مطلب نہیں کہ قیامت کے روز ہمیں وہ نزدیکی اور مرتبہ دلوائیں گے ۔ اس لیے کہ قیامت کے تو وہ قائل ہی نہ تھے یہ بھی کہا گیا ہے کہ وہ انہیں اپنا سفارشی جانتے تھے ۔ جاہلیت کے زمانہ میں حج کو جاتے تو وہاں لبیک پکارتے ہوئے کہتے «لَبَّیْکَ لَا شَرِیکَ لَک إِلَّا شَرِیکًا ہُوَ لَک تَمْلِکُہُ وَمَا مَلَکَ» اللہ ہم تیرے پاس حاضر ہوئے ۔ تیرا کوئی شریک نہیں مگر ایسے شریک جن کے اپنے آپ کا مالک بھی تو ہی ہے اور جو چیزیں ان کے ماتحت ہیں ان کا بھی حقیقی مالک تو ہی ہے ۔ یہی شبہ اگلے پچھلے تمام مشرکوں کو رہا اور اسی کو تمام انبیاء علیہم السلام رد کرتے رہے اور صرف اللہ تعالیٰ واحد کی عبادت کی طرف انہیں بلاتے رہے ۔ یہ عقیدہ مشرکوں نے بے دلیل گھڑ لیا تھا جس سے اللہ بیزار تھا ۔ فرماتا ہے «وَلَقَدْ بَعَثْنَا فِیْ کُلِّ اُمَّۃٍ رَّسُوْلًا» ۱؎ (16-النحل:36) ، یعنی ' ہر امت میں ہم نے رسول بھیجے کہ تم اللہ ہی کی عبادت کرو اور اس کے سوا ہر ایک کی عبادت سے الگ رہو ' اور فرمایا «وَمَآ اَرْسَلْنَا مِنْ قَبْلِکَ مِنْ رَّسُوْلٍ اِلَّا نُوْحِیْٓ اِلَیْہِ اَنَّہٗ لَآ اِلٰہَ اِلَّآ اَنَا فَاعْبُدُوْنِ» ۱؎ (21-الأنبیاء:25) ، یعنی ' تجھ سے پہلے جتنے رسول ہم نے بھیجے سب کی طرف یہی وحی کی کہ معبود برحق صرف میں ہی ہوں پس تم سب میری ہی عبادت کرنا ' ۔ ساتھ ہی یہ بھی بیان فرمادیا کہ ' آسمان میں جس قدر فرشتے ہیں خواہ وہ کتنے ہی بڑے مرتبے والے کیوں نہ ہوں سب کے سب اس کے سامنے لاچار عاجز اور غلاموں کی مانند ہیں اتنا بھی تو اختیار نہیں کہ کسی کی سفارش میں لب ہلا سکیں ' ۔

یہ عقیدہ محض غلط ہے کہ وہ اللہ کے پاس ایسے ہیں جیسے بادشاہوں کے پاس امیر امراء ہوتے ہیں کہ جس کی وہ سفارش کر دیں اس کا کام بن جاتا ہے اس باطل اور غلط عقیدے سے یہ کہہ کر منع فرمایا کہ « فَلَا تَضْرِ‌بُوا لِلہِ الْأَمْثَالَ إِنَّ اللہَ یَعْلَمُ وَأَنتُمْ لَا تَعْلَمُونَ » ۱؎ (16-النحل:74) ' اللہ کے سامنے مثالیں نہ بیان کیا کرو ۔ اللہ اسے بہت بلند و بالا ہے ' ۔ قیامت کے روز اللہ تعالیٰ اپنی مخلوق کا سچا فیصلہ کر دے گا اور ہر ایک کو اس کے اعمال کا بدلہ دے گا ان سب کو جمع کر کے فرشتوں سے سوال کرے گا کہ ' کیا یہ لوگ تمہیں پوجتے تھے ؟ ' وہ جواب دیں گے کہ تو پاک ہے ، یہ نہیں بلکہ ہمارا ولی تو تو ہی ہے یہ لوگ تو جنات کی پرستش کرتے تھے اور ان میں سے اکثر کا عقیدہ و ایمان انہی پر تھا ۔ اللہ تعالیٰ انہیں راہ راست نہیں دکھاتا جن کا مقصود اللہ پر جھوٹ بہتان باندھنا ہو اور جن کے دل میں اللہ کی آیتوں ، اس کی نشانیوں اور اس کی دلیلوں سے کفر بیٹھ گیا ہو ۔

پھر اللہ تعالیٰ نے ان لوگوں کے عقیدے کی نفی کی جو اللہ کی اولاد ٹھہراتے تھے مثلاً مشرکین مکہ کہتے تھے کہ فرشتے اللہ کی لڑکیاں ہیں ۔ یہود کہتے تھے عزیز علیہ السلام اللہ کے لڑکے ہیں ۔ عیسائی گمان کرتے تھے کہ عیسیٰ علیہ السلام اللہ کے بیٹے ہیں ۔ پس فرمایا کہ ' جیسا ان کا خیال ہے اگر یہی ہوتا تو اس امر کے خلاف ہوتا ' ، پس یہاں شرط نہ تو واقع ہونے کے لیے ہے نہ امکان کے لیے ۔ بلکہ محال کے لیے ہے اور مقصد صرف ان لوگوں کی جہالت بیان کرنے کا ہے ۔ جیسے فرمایا «لَـوْ اَرَدْنَآ اَنْ نَّتَّخِذَ لَہْوًا لَّاتَّخَذْنٰہُ مِنْ لَّدُنَّآ اِنْ کُنَّا فٰعِلِیْنَ» ۱؎ (21-الأنبیاء:17) ، ' اگر ہم ان بیہودہ باتوں کا ارادہ کرتے تو اپنے پاس سے ہی بنا لیتے اگر ہم کرنے والے ہی ہوتے' ۔ اور آیت میں ہے «قُلْ اِنْ کَان للرَّحْمٰنِ وَلَدٌ فَاَنَا اَوَّلُ الْعٰبِدِیْنَ» ۱؎ (43-الزخرف:81) یعنی ' کہدے کہ اگر رحمان کی اولاد ہوتی تو میں تو سب سے پہلے اس کا قائل ہوتا ' ۔ پس یہ سب آیتیں شرط کو محال کے ساتھ متعلق کرنے والی ہیں ۔ امکان یا وقوع کے لیے نہیں بلکہ مطلب یہ ہے کہ نہ یہ ہو سکتا ہے نہ وہ ہو سکتا ہے ۔ اللہ ان سب باتوں سے پاک ہے وہ فرد احد ، صمد اور واحد ہے ۔ ہرچیز اس کی ماتحت فرمانبردار عاجز محتاج فقیر بے کس اور بے بس ہے ۔ وہ ہرچیز سے غنی ہے سب سے بےپرواہ ہے سب پر اس کی حکومت اور غلبہ ہے ، ظالموں کے ان عقائد سے اور جاہلوں کی ان باتوں سے اس کی ذات مبرا و منزہ ہے ۔

حجم الخط:
شارك الصفحة
فضلًا انتظر تحميل الصوت