أرشيف الكتب الإسلامية
فهرس الكتاب

‹
›
الصفحة 3829 من 6343

شیاطین اور کاہن

آسمان دنیا کو دیکھنے والے کی نگاہوں میں جو زینت دی گئی ہے اس کا بیان فرمایا ۔ یہ اضافت کے ساتھ بھی پڑھا گیا ہے اور بدلیت کے ساتھ بھی معنی دونوں صورتوں میں ایک ہی ہیں ۔ اس کے ستاروں کی ، اس کے سورج کی روشنی زمین کو جگمگادیتی ہے ۔ جیسے اور آیت میں ہے «وَلَقَدْ زَیَّنَّا السَّمَاءَ الدٰنْیَا بِمَصَابِیْحَ وَجَعَلْنٰہَا رُجُوْمًا لِّلشَّـیٰطِیْنِ وَاَعْتَدْنَا لَہُمْ عَذَاب السَّعِیْرِ» ۱؎ (67-الملک:5) ، ' ہم نے آسمان دنیا کو زینت دی ستاروں کے ساتھ ، اور انہیں شیطانوں کے لیے شیطانوں کے رجم کا ذریعہ بنایا اور ہم نے ان کے لیے آگ سے جلا دینے والے عذاب تیار کر رکھے ہیں ' ۔

اور آیت میں ہے «وَلَقَدْ جَعَلْنَا فِی السَّمَاءِ بُرُوجًا وَزَیَّنَّاہَا لِلنَّاظِرِینَ وَحَفِظْنَاہَا مِن کُلِّ شَیْطَانٍ رَّجِیمٍ إِلَّا مَنِ اسْتَرَقَ السَّمْعَ فَأَتْبَعَہُ شِہَابٌ مٰبِینٌ» ۱؎ (15-الحجر:16-18) ' ہم نے آسمان میں برج بنائے اور انہیں دیکھنے والوں کی آنکھوں میں کھب جانے والی چیز بنائی ۔ اور ہر شیطان رجیم سے اسے محفوظ رکھا جو کوئی کسی بات کو لے اڑنا چاہتا ہے وہیں ایک تیز شعلہ اس کی طرف اترتا ہے ۔ اور ہم نے آسمانوں کی حفاظت کی ہر سرکش شریر شیطان سے ، اس کا بس نہیں کہ فرشتوں کی باتیں سنے ، وہ جب یہ کرتا ہے تو ایک شعلہ لپکتا ہے اور اسے جلا دیتا ہے ' ۔ یہ آسمانوں تک پہنچ ہی نہیں سکتے ۔ اللہ کی شریعت تقدیر کے امور کی کسی گفتگو کو وہ سن ہی نہیں سکتے ۔ اس بارے کی حدیثیں ہم نے آیت «حَتّیٰٓ اِذَا فُزِّعَ عَنْ قُلُوْبِہِمْ قَالُوْا مَاذَا قَالَ رَبٰکُمْ قَالُوا الْحَقَّ وَہُوَ الْعَلِیٰ الْکَبِیْرُ» ۱؎ (34-سبأ:23) ، کی تفسیر میں بیان کر دی ہیں ۔ جدھر سے بھی یہ آسمان پر چڑھنا چاہتے ہیں وہیں سے ان پر آتش بازی کی جاتی ہے ۔ انہیں ہنکانے پست و ذلیل کرنے روکنے اور نہ آنے دینے کے لیے یہ سزا بیان کی ہے اور آخرت کے دائمی عذاب ابھی باقی ہیں ، جو بڑے المناک درد ناک اور ہمیشگی والے ہوں گے ۔ ہاں کبھی کسی جن نے کوئی کلمہ کسی فرشتے کی زبان سے سن لیا اور اسے اس نے اپنے نیچے والے سے کہدیا اور اس نے اپنے نیچے والے سے وہیں اس کے پیچھے ایک شعلہ لپکتا ہے کبھی تو وہ دوسرے کو پہنچائے اس سے پہلے ہی شعلہ اسے جلا ڈالتا ہے کبھی وہ دوسرے کے کانوں تک پہنچا دیتا ہے ۔ یہی وہ باتیں ہیں جو کاہنوں کے کانوں تک شیاطین کے ذریعہ پہنچ جاتی ہیں ۔ ثاقب سے مراد سخت تیز بہت زیادہ روشنی والا ہے۔

سیدنا ابن عباس رضی اللہ عنہما کا بیان ہے کہ " شیاطین پہلے جا کر آسمانوں میں بیٹھتے تھے اور وہی سن لیتے تھے اس وقت ان پر تارے نہیں ٹوٹتے تھے یہ وہاں کی وحی سن کر زمین پر آ کر ایک کی دس دس کر کے کاہنوں کے کانوں میں پھونکتے تھے ، جب نبی کریم صلی اللہ علیہ وسلم کو نبوت ملی پھر شیطانوں کا آسمان پر جانا موقوف ہوا ، اب یہ جاتے ہیں تو ان پر آگ کے شعلے پھینکے جاتے ہیں اور انہیں جلا دیا جاتا ہے ، انہوں نے اس نو پیدا امر کی خبر جب ابلیس ملعون کو دی تو اس نے کہا کہ کسی اہم نئے کام کی وجہ سے اس قدر احتیاط و حفاظت کی گئی ہے ۔ چنانچہ خبر رسانوں کی جماعتیں اس نے روئے زمین پر پھیلا دیں تو جو جماعت حجاز کی طرف گئی تھی اس نے دیکھا کہ رسول اللہ صلی اللہ علیہ وسلم نخلہ کی دونوں پہاڑیوں کے درمیان نماز ادا کر رہے ہیں اس نے جا کر ابلیس کو یہ خبر دی اس نے کہا بس یہی وجہ ہے جو تمہارا آسمانوں پر جانا موقوف ہوا ۔ اس کی پوری تحقیق اللہ نے چاہا تو آیت « وَّاَنَّا لَمَسْنَا السَّمَاء فَوَجَدْنٰہَا مُلِئَتْ حَرَسًا شَدِیْدًا وَّشُہُبًا» ۱؎ (72-الجن:8) ، کی تفسیر میں آئے گی ۔

حجم الخط:
شارك الصفحة
فضلًا انتظر تحميل الصوت