أرشيف الكتب الإسلامية
فهرس الكتاب

‹
›
الصفحة 4881 من 6343

جیسے اور جگہ فرمان ہے «أَیَحْسَبُ الْإِنسَانُ أَن یُتْرَکَ سُدًی أَلَمْ یَکُ نُطْفَۃً مِّن مَّنِیٍّ یُمْنَیٰ ثُمَّ کَانَ عَلَقَۃً فَخَلَقَ فَسَوَّیٰ فَجَعَلَ مِنْہُ الزَّوْجَیْنِ الذَّکَرَ وَالْأُنثَیٰ أَلَیْسَ ذٰلِکَ بِقَادِرٍ عَلَیٰ أَن یُحْیِیَ الْمَوْتَیٰ» ۱؎ (75-القیامۃ:40-36) ، ' کیا انسان سمجھتا ہے کہ وہ بےکار چھوڑ دیا جائے گا ؟ ، کیا وہ منی کا قطرہ نہ تھا ، جو [ رحم میں ] ٹپکایا جاتا ہے ؟ ، پھر کیا وہ بستہ خون نہ تھا ؟ ، پھر اللہ نے اسے پیدا کیا اور درست کیا اور اس سے جوڑے یعنی نرو مادہ بنائے ، کیا [ ایسی قدرتوں والا ] اللہ اس بات پر قادر نہیں کہ مردوں کو زندہ کر دے ۔' پھر فرماتا ہے اسی پر دوبارہ زندہ کرنا ، یعنی جیسے اس نے ابتداء پیدا کیا اسی طرح مار ڈالنے کے بعد دوبارہ کی پیدائش بھی اسی کے ذمہ ہے ، اسی نے اپنے بندوں کو غنی بنا دیا اور مال ان کے قبضہ میں دے دیا ہے جو ان کے پاس ہی بطور پونجی کے رہتا ہے ۔

اکثر مفسرین کے کلام کا خلاصہ اس مقام پر یہی ہے گو بعض سے مروی ہے کہ اس نے مال دیا اور غلام دئیے ، اس نے دیا اور خوش ہوا ، اسے غنی بنا کر اور مخلوق کو اس کا دست نگر بنا دیا ، جسے چاہا غنی کیا ، جسے چاہا فقیر لیکن یہ پچھلے دونوں قول لفظ سے کچھ زیادہ مطابقت نہیں رکھتے ۔ «شعریٰ» اس روشن ستارے کا نام ہے جسے «مِرْزَم الْجَوْزَاء» بھی کہتے ہیں بعض عرب اس کی پرستش کرتے تھے ۔ عاد و اولیٰ یعنی قوم ہود کو جسے عاد بن ارم بن سام بن نوح بھی کہا جاتا ہے اسی نے ان کی نافرمانی کی بنا پر تباہ کر دیا ۔ جیسے فرمایا «أَلَمْ تَرَ کَیْفَ فَعَلَ رَبٰکَ بِعَادٍ إِرَمَ ذَاتِ الْعِمَادِ الَّتِی لَمْ یُخْلَقْ مِثْلُہَا فِی الْبِلَادِ» ۱؎ (89-الفجر:6-8) ، یعنی ' کیا تو نے نہیں دیکھا کہ تیرے رب نے عاد کے ساتھ کیا کیا ؟ ' یعنی ارم کے ساتھ جو بڑے قدآور تھے جن کا مثل شہروں میں پیدا نہیں کیا گیا تھا یہ قوم بڑی قوی اور زور آور تھی ساتھ ہی اللہ کی بڑی نافرمان اور رسول سے بڑی سرتاب تھی۔ «وَأَمَّا عَادٌ فَأُہْلِکُوا بِرِیحٍ صَرْصَرٍ عَاتِیَۃٍ سَخَّرَہَا عَلَیْہِمْ سَبْعَ لَیَالٍ وَثَمَانِیَۃَ أَیَّامٍ حُسُومًا» ۱؎ (69-الحاقۃ:6،7) ان پر ہوا کا عذاب آیا جو سات راتیں اور آٹھ دن برابر رہا ، اسی طرح ثمودیوں کو بھی اس نے ہلاک کر دیا جس میں سے ایک بھی باقی نہ بچا اور ان سے پہلے قوم نوح تباہ ہو چکی ہے جو بڑے ناانصاف اور شریر تھے اور لوط کی بستیاں جنہیں رحمن و قہار نے زیر و زبر کر دیا اور آسمانی پتھروں سے سب بدکاروں کا ہلاک کر دیا انہیں ایک چیز نے ڈھانپ لیا یعنی [ پتھروں نے ] اور آیت میں ہے «وَأَمْطَرْنَا عَلَیْہِم مَّطَرًا فَسَاءَ مَطَرُ الْمُنذَرِینَ» ۱؎ (26-الشعراء:173) ' جن کا مینہ ان پر برسا اور برے حالوں تباہ ہوئے ۔ ' ان بستیوں میں چار لاکھ آدمی آباد تھے ، آبادی کی کل زمین کی آگ اور گندھک اور تیل بن کر ان پر بھڑک اٹھی ۔ قتادہ رحمہ اللہ کا یہی قول ہے جو بہت غریب سند سے ابن ابی حاتم میں مروی ہے ۔ پھر فرمایا: ' پھر تو اے انسان ! اپنے رب کی کس کس نعمت پر جھگڑے گا ؟ ' بعض کہتے ہیں خطاب نبی کریم صلی اللہ علیہ وسلم سے ہے لیکن خطاب کو عام رکھنا بہت اولیٰ ہے ابن جریر رحمہ اللہ بھی عام رکھنے کو ہی پسند فرماتے ہیں ۔۱؎ (تفسیر ابن جریر الطبری:540/11)

حجم الخط:
شارك الصفحة
فضلًا انتظر تحميل الصوت