أرشيف الكتب الإسلامية
فهرس الكتاب

‹
›
الصفحة 2600 من 6343

جہنم کی ہولناکیاں

بت پرستوں سے اللہ تعالیٰ فرماتا ہے کہ ' تم اور تمہارے بت جہنم کی آگ کی لکڑیاں بنوگے ' ۔ جیسے فرمان ہے آیت «وَقُودُہَا النَّاسُ وَالْحِجَارَۃُ» ۱؎ (66-التحریم:6) (2-البقرۃ:24) ' اس کا ایندھن انسان ہیں اور پتھر ' ۔ حبشی زبان میں حطب کو «حَصَبُ» کہتے ہیں یعنی لکڑیاں ۔ بلکہ ایک قرأت میں بجائے «حَصَبُ» کے «حَطَبْ» ہے ۔ ' تم سب عابد و معبود جہنمی ہو اور وہ بھی ہمیشہ کے لیے ' ۔ اگر یہ سچے معبود ہوتے کیوں آگ میں جلتے ؟ یہاں تو پرستار اور پرستش کئے جانے والے سب ابدی طور پردوزخی ہو گئے وہ الٹی سانس میں چیخیں گے ۔ جیسے فرمان ہے آیت « فَاَمَّا الَّذِیْنَ شَقُوْا فَفِی النَّارِ لَہُمْ فِیْہَا زَفِیْرٌ وَّشَہِیْقٌ» ۱؎ (11-ھود:106) ، ' وہ سیدھی الٹی سانسوں سے چیخیں گے اور چیخوں کے سوا ان کے کان میں اور کوئی آواز نہ پڑے گی ' ۔ سیدنا ابن مسعود رضی اللہ عنہ سے مروی ہے کہ " جب صرف مشرک جہنم میں رہ جائیں گے انہیں آگ کے صندوقوں میں قید کر دیا جائے گا جن میں آگ کے سریے ہوں گے ان میں سے ہر ایک کو یہی گمان ہو گا کہ جہنم میں اس کے سوا اور کوئی نہیں " پھر آپ رضی اللہ عنہ نے یہی آیت تلاوت فرمائی ۔ (ابن جریر)

«حُسْنَیٰ» سے مراد رحمت وسعادت ہیں ۔ دوزخیوں کا اور ان کے عذابوں کا ذکر کر کے اب نیک لوگوں اور ان کی جزاؤں کا ذکر ہو رہا ہے یہ لوگ باایمان تھے ان کے نیک اعمال کی وجہ سے سعادت ان کے استقبال کو تیار تھی ۔ جیسے فرمان ہے آیت «لِلَّذِیْنَ اَحْسَـنُوا الْحُسْنٰی وَزِیَادَۃٌ وَلَا یَرْہَقُ وُجُوْہَھُمْ قَتَرٌ وَّلَا ذِلَّۃٌ اُولٰیِٕکَ اَصْحٰبُ الْجَنَّۃِ ھُمْ فِیْہَا خٰلِدُوْنَ» ۱؎ (10-یونس:26) ' نیکوں کے لیے نیک اجر ہے اور زیادتی اجر بھی ' ۔ فرمان ہے آیت «ہَلْ جَزَاءُ الْاِحْسَانِ اِلَّا الْاِحْسَانُ» ۱؎ (55-الرحمن:60) ' نیکی کا بدلہ نیکی ہی ہے ' ۔ ان کے دنیا کے اعمال نیک تھے تو آخرت میں ثواب اور نیک بدلہ ملا ، عذاب سے بچے اور رحمت رب سے سرفراز ہوئے ۔ یہ جہنم سے دور کر دئیے گئے کہ اس کی آہٹ تک نہیں سنتے نہ دوزخیوں کا جلنا وہ سنتے ہیں ۔ پل صراط پردوزخیوں کو زہریلے ناگ ڈستے ہیں اور یہ وہاں ہائے ہائے کرتے ہیں جنتی لوگوں کے کان بھی اس درد ناک آواز سے ناآشنا رہیں گے ۔ اتنا ہی نہیں کہ خوف ڈر سے یہ الگ ہو گئے بلکہ ساتھ ہی راحت و آرام بھی حاصل کر لیا ۔ من مانی چیزیں موجود ۔ دوامی کی راحت بھی حاضر ۔ سیدنا علی رضی اللہ عنہ نے ایک رات اس آیت کی تلاوت کی اور فرمایا " میں اور عمر عثمان اور زبیر اور طلحہ اور عبدالرحمٰن انہی لوگوں میں سے ہیں " یا سعد کا نام لیا رضی اللہ عنہم ۔ اتنے میں نماز کی تکبیر ہوئی تو آپ رضی اللہ عنہ چادر گھیسٹتے آیت «لَا یَسْمَعُونَ حَسِیسَہَا» ، پڑھتے ہوئے اٹھ کھڑے ہو گئے ۔ اور روایت میں ہے کہ آپ رضی اللہ عنہ نے فرمایا " عثمان رضی اللہ عنہ اور ان کے ساتھی ایسے ہی ہیں " ۔ ابن عباس رضی اللہ عنہما فرماتے ہیں " یہی لوگ اولیاء اللہ ہیں بجلی سے بھی زیادہ تیزی کے ساتھ پل صراط سے پار ہو جائیں گے اور کافر وہیں گھٹنوں کے بل گر پڑیں گے " ۔ بعض کہتے ہیں اس سے مراد وہ بزرگان دین ہیں جو اللہ والے تھے شرکت سے بیزار تھے لیکن ان کے بعد لوگوں نے ان کی مرضی کے خلاف ان کی پوجا پاٹ شروع کر دی تھی ، عزیر ، مسیح ، فرشتے ، سورج ، چاند ، مریم ، وغیرہ ۔

عبداللہ بن زبعری نبی کریم صلی اللہ علیہ وسلم کے پاس آیا اور کہنے لگا تیرا خیال ہے کہ اللہ نے آیت «اِنَّکُمْ وَمَا تَعْبُدُوْنَ مِنْ دُوْنِ اللّٰہِ حَصَبُ جَہَنَّمَ اَنْتُمْ لَہَا وٰرِدُوْنَ» ۱؎ (21-الأنبیاء:98) اتاری ہے ؟ اگر یہ سچ ہے تو کیا سورج چاند ، فرشتے عزیر ، عیسیٰ ، سب کہ سب ہمارے بتوں کے ساتھ جہنم میں جائیں گے ؟ اس کے جواب میں آیت «وَلَمَّا ضُرِبَ ابْنُ مَرْیَمَ مَثَلًا اِذَا قَوْمُکَ مِنْہُ یَصِدٰوْنَ» ۱؎ (43-الزخرف:57) اور آیت «اِنَّ الَّذِیْنَ سَبَقَتْ لَہُمْ مِّنَّا الْحُسْنٰٓی اُولٰیِٕکَ عَنْہَا مُبْعَدُوْنَ» ۱؎ (21-الأنبیاء:101) نازل ہوئی ۔ سیرت ابن اسحاق میں ہے { نبی کریم صلی اللہ علیہ وسلم ایک دن ولید بن مغیرہ کے ساتھ مسجد میں بیٹھے ہوئے تھے کہ نضر بن حارث آیا اس وقت مسجد میں اور قریشی بھی بہت سارے تھے نضر بن حارث رسول اللہ صلی اللہ علیہ وسلم سے باتیں کر رہا تھا لیکن وہ لاجوب ہو گیا آپ صلی اللہ علیہ وسلم نے آیت «اِنَّکُمْ وَمَا تَعْبُدُوْنَ مِنْ دُوْنِ اللّٰہِ حَصَبُ جَہَنَّمَ اَنْتُمْ لَہَا وٰرِدُوْنَ لَوْ کَانَ ہٰؤُلَاءِ آلِہَۃً مَّا وَرَدُوہَا وَکُلٌّ فِیہَا خَالِدُونَ لَہُمْ فِیہَا زَفِیرٌ وَہُمْ فِیہَا لَا یَسْمَعُونَ» ۱؎ (21-الأنبیاء:100-98) تلاوت فرمائی ۔ جب آپ صلی اللہ علیہ وسلم اس مجلس سے چلے گئے تو عبداللہ بن زبعری آیا لوگوں نے اس سے کہا آج نضر بن حارث نے باتیں کیں لیکن بری طرح چت ہوئے اور یہ فرماتے ہوئے چلے گے ۔ اس نے کہا اگر میں ہوتا تو انہیں جواب دیتا کہ ہم فرشتوں کو پوجتے ہیں یہود عزیر کو نصرانی مسیح کو تو کیا یہ سب بھی جہنم میں جلیں گے ؟ سب کو یہ جواب بہت پسند آیا جب نبی کریم صلی اللہ علیہ وسلم سے اس کا ذکر آیا تو آپ صلی اللہ علیہ وسلم نے فرمایا: جس نے اپنی عبادت کرائی وہ عابدوں کے ساتھ جہنم میں ہے یہ بزرگ اپنی عبادتیں نہیں کراتے تھے بلکہ یہ لوگ تو انہیں نہیں شیطان کو پوج رہے ہیں اسی نے انہیں ان کی عبادت کی راہ بتائی ہے } ۔ آپ صلی اللہ علیہ وسلم کے جواب کے ساتھ ہی قرآنی جواب اس کے بعد ہی آیت «إِنَّ الَّذِینَ سَبَقَتْ لَہُم مِّنَّا الْحُسْنَیٰ أُولٰئِکَ عَنْہَا مُبْعَدُونَ» ۱؎ (21-الأنبیاء:101) میں اترا تو جن نیک لوگوں کی جاہلوں نے پرستش کی تھی وہ اس سے مستثنیٰ ہو گئے ۔ چنانچہ قرآن میں ہے آیت «مَن یَقُلْ مِنْہُمْ إِنِّی إِلٰہٌ مِّن دُونِہِ فَذٰلِکَ نَجْزِیہِ جَہَنَّمَ کَذٰلِکَ نَجْزِی الظَّالِمِینَ» ۱؎ (21-الأنبیاء:29) یعنی ' ان میں سے جو اپنی معبودیت اوروں سے منوانی چاہے اس کا بدلہ جہنم ہے ہم ظالموں کو اسی طرح سزا دیتے ہیں ' ۔ اور آیت «وَلَمَّا ضُرِبَ ابْنُ مَرْیَمَ مَثَلًا اِذَا قَوْمُکَ مِنْہُ یَصِدٰوْنَ وَقَالُوا أَآلِہَتُنَا خَیْرٌ أَمْ ہُوَ مَا ضَرَبُوہُ لَکَ إِلَّا جَدَلًا بَلْ ہُمْ قَوْمٌ خَصِمُونَ إِنْ ہُوَ إِلَّا عَبْدٌ أَنْعَمْنَا عَلَیْہِ وَجَعَلْنَاہُ مَثَلًا لِّبَنِی إِسْرَائِیلَ وَلَوْ نَشَاءُ لَجَعَلْنَا مِنکُم مَّلَائِکَۃً فِی الْأَرْضِ یَخْلُفُونَ» ۱؎ (43-الزخرف:57-60) اتری کہ ' اس بات کہ سنتے ہی وہ لوگ متعجب ہوگئے اور کہنے لگے ہمارے معبود اچھے یا وہ یہ تو صرف دھینگا مشتی ہے اور یہ لوگ جھگڑالو ہی ہیں وہ ہمارا انعام یافتہ بندہ تھا اسے ہم نے بنی اسرائیل کے لیے نمونہ بنایا تھا ۔ اگر ہم چاہتے تو تمہارے جانشین فرشتوں کو کر دیتے ' ۔ «وَإِنَّہُ لَعِلْمٌ لِّلسَّاعَۃِ فَلَا تَمْتَرُنَّ بِہَا وَاتَّبِعُونِ ہٰذَا صِرَاطٌ مٰسْتَقِیمٌ» ۱؎ (43-الزخرف:61) ' عیسیٰ [ علیہ السلام ] نشانِ قیامت ہیں ان کے ہاتھ سے جو معجزات صادر ہوئے وہ شبہ والی چیزیں نہیں وہ قیامت کی دلیل ہیں تجھے اس میں کچھ شک نہ کرنا چاہے ۔ میری مانتا چلا جا یہی صراط مستقیم ہے ' ۔ ابن زبعری کی جرات دیکھئیے خطاب اہل مکہ سے ہے اور ان کی ان تصویروں اور پتھروں کے لیے کہا گیا ہے جنہیں وہ سوائے اللہ کے پوجا کرتے تھے نہ کہ عیسیٰ علیہ السلام وغیرہ پاک نفس کے لیے جو غیر اللہ کی عبادت سے روکتے تھے ۔ امام ابن جریر رحمتہ اللہ علیہ فرماتے ہیں لفظ «ما» جو یہاں ہے وہ عرب میں ان کے لیے آتا ہے جو بے جان اور بے عقل ہوں ۔

یہ ابن زبعری اس کے بعد مسلمان ہوگئے تھے رضی اللہ عنہ ۔ یہ بڑے مشہور شاعر تھے ۔ پہلے انہوں نے مسلمانوں کی دل کھول کر دھول اڑائی تھی لیکن مسلمان ہونے کے بعد معذرت کی ۔ موت کی گھبراہٹ ، اس گھڑی کی گھبراہٹ جبکہ جہنم پر ڈھکن ڈھک دیا جائے گا جب کہ موت کو دوزخ جنت کے درمیان ذبح کر دیا جائے گا ۔ غرض کسی اندیشے کا نزول ان پر نہ ہوگا وہ ہر غم و ہراس سے دور ہوں گے ، پورے مسرور ہوں گے ، خوش ہوں گے اور ناخوشی سے کوسوں الگ ہوں گے ۔ فرشتوں کے پرے کے پرے ان سے ملاقاتیں کر رہے ہوں گے اور انہیں ڈھارس دیتے ہوئے کہتے ہوں گے کہ اسی دن کا وعدہ تم سے کیا گیا تھا ، اس وقت تم قبروں سے اٹھنے کے دن کے منتظر رہو ۔

حجم الخط:
شارك الصفحة
فضلًا انتظر تحميل الصوت