أرشيف الكتب الإسلامية
فهرس الكتاب

‹
›
الصفحة 927 من 6343

سب سے بےنیاز اللہ

اللہ تعالیٰ اپنی تمام مخلوق سے بے نیاز ہے ، اسے کسی کی کوئی حاجت نہیں ، اسے کسی سے کوئی فائدہ نہیں وہ کسی کا محتاج نہیں ، ساری مخلوق اپنے ہر حال میں اس کی محتاج ہے ۔ وہ بڑی ہی رافت و رحمت والا ہے رحم و کرم اس کی خاص صفتیں ہیں ۔ جیسے فرمان ہے آیت «اِنَّ اللّٰہَ بالنَّاسِ لَرَءُوْفٌ رَّحِیْمٌ» ۱؎ (2-البقرۃ:143) ' اللہ اپنے بندوں کے ساتھ مہربانی اور لطف سے پیش آنے والا ہے ' ، تو جو اس کی مخالفت کر رہے ہو تو یاد رکھو کہ «إِن یَشَأْ یُذْہِبْکُمْ أَیٰہَا النَّاسُ وَیَأْتِ بِآخَرِینَ وَکَانَ اللہُ عَلَیٰ ذٰلِکَ قَدِیرًا» ۱؎ (4-النساء:133) ' اگر وہ چاہے تو تمہیں ایک آن میں غارت کر سکتا ہے اور تمہارے بعد ایسے لوگوں کو بسا سکتا ہے جو اس کی اطاعت کریں ' ۔ یہ اس کی قدرت میں ہے تم دیکھ لو اس نے آخر اوروں کے قائم مقام تمہیں بھی کیا ہے ۔ ایک قرن کے بعد دوسرا قرن وہی لاتا ہے ایک کو مار ڈالتا ہے ، دوسرے کو پیدا کر دیتا ہے لانے لے جانے پر اسے مکمل قدرت ہے ۔ جیسے فرمان ہے ' اگر وہ چاہے تو اے لوگو تم سب کو فنا کر دے اور دوسروں کو لے آئے وہ اس پر قادر ہے ' ۔ فرمان ہے آیت «یٰٓاَیٰہَا النَّاسُ اَنْتُمُ الْفُقَرَاءُ اِلَی اللّٰہِ وَاللّٰہُ ہُوَ الْغَنِیٰ الْحَمِیْدُ إِن یَشَأْ یُذْہِبْکُمْ وَیَأْتِ بِخَلْقٍ جَدِیدٍ وَمَا ذٰلِکَ عَلَی اللہِ بِعَزِیزٍ» ۱؎ (35-فاطر:17-15) ' لوگو تم سب کے سب اللہ کے محتاج ہو اور اللہ تعالیٰ بے نیاز اور تعریفوں والا ہے ۔ اگر وہ چاہے تو تم سب کو فنا کر دے اور نئی مخلوق لے آئے اللہ کے لیے کوئی انوکھی بات نہیں ' ۔

اور فرمان ہے آیت «وَاللّٰہُ الْغَنِیٰ وَاَنْتُمُ الْفُقَرَاءُ» (47-محمد:38) ' اللہ غنی ہے اور تم سب فقیر ہو ' ۔ فرماتا ہے ' اگر تم نافرمان ہو گئے تو وہ تمہیں بدل کر اور قوم لائے گا جو تم جیسے نہ ہوں گے ' ۔ «ذٰرِّیَّۃُ» سے مراد اصل و نسل ہے ۔ ' اے نبی صلی اللہ علیہ وسلم آپ صلی اللہ علیہ وسلم ان سے کہہ دیجئیے کہ قیامت جنت دوزخ وغیرہ کے جو وعدے تم سے کئے جا رہے ہیں وہ یقینًا سچے ہیں اور یہ سب کچھ ہونے والا ہے تم اللہ کو عاجز نہیں کر سکتے وہ تمہارے اعادے پر قادر ہے ۔ تم گل سڑ کر مٹی ہو جاؤ گے پھر وہ تمہیں نئی پیدائش میں پیدا کرے گا اس پر کوئی عمل مشکل نہیں ' ۔

{ حضور صلی اللہ علیہ وسلم فرماتے ہیں اے بنی آدم اگر تم میں عقل ہے تو اپنے تئیں مردوں میں شمار کرو واللہ اللہ کی فرمائی ہوئی سب باتیں بہ یقین ہونے والی ہیں کوئی نہیں جو اللہ کے ارادے میں اسے ناکام کر دے ، اس کی چاہت کو نہ ہونے دے } ۔ ۱؎ (تفسیر ابن ابی حاتم:7907/4:ضعیف) لوگوں تم اپنی کرنی کئے جاؤ میں اپنے طریقے پر قائم ہوں ابھی ابھی معلوم ہو جائے گا کہ ہدایت پر کون تھا ؟ اور ضلالت پر کون تھا ؟ کون نیک انجام ہوتا ہے اور کون گھٹنوں میں سر ڈال کر روتا ہے ۔ جیسے فرمایا «وَقُل لِّلَّذِینَ لَا یُؤْمِنُونَ اعْمَلُوا عَلَیٰ مَکَانَتِکُمْ إِنَّا عَامِلُونَ وَانتَظِرُوا إِنَّا مُنتَظِرُونَ» (11-ھود:121-122) ' بے ایمانوں سے کہہ دو کہ تم اپنے شغل میں رہو میں بھی اپنے کام میں لگا ہوں ۔ تم منتظر رہو ہم بھی انتظار میں ہیں معلوم ہو جائے گا کہ انجام کے لحاظ سے کون اچھا رہا ؟ یاد رکھو اللہ نے جو وعدے اپنے رسول صلی اللہ علیہ وسلم سے کئے ہیں سب اٹل ہیں ' ۔ چنانچہ دنیا نے دیکھ لیا کہ وہ نبی صلی اللہ علیہ وسلم جس کا چپہ چپہ مخالف تھا جس کا نام لینا دوبھر تھا ، جو یکہ و تنہا تھا ، جو وطن سے نکال دیا گیا تھا ، جس کی دشمنی ایک ایک کرتا تھا ، اللہ نے اسے غلبہ دیا لاکھوں دلوں پر اس کی حکومت ہو گئی اس کی زندگی میں ہی تمام جزیرہ عرب کا وہ تنہا مالک بن گیا یمن اور بحرین پر بھی اس کے سامنے اس کا جھنڈا لہرانے لگا ۔ پھر اس کے جانشینوں نے دنیا کو کھنگال ڈالا بڑی بڑی سلطنتوں کے منہ پھیر دیئے ، جہاں گئے غلبہ پایا جدھر رخ کیا ، فتح حاصل کی ، یہی اللہ کا وعدہ تھا کہ ' میں اور میرے رسول غالب آئیں گے ، مجھ سے زیادہ قوت وعزت کسی کی نہیں ' ۔ فرما دیا تھا کہ «کَتَبَ اللہُ لَأَغْلِبَنَّ أَنَا وَرُسُلِی» ۱؎ (58-المجادلۃ:20) ' اللہ کا حکم ناطق ہے کہ میں اور میرے پیغمبر ضرور غالب رہیں گے ' ۔ « إِنَّا لَنَنْصُرُ رُسُلَنَا وَالَّذِینَ آمَنُوا فِی الْحَیَاۃِ الدٰنْیَا وَیَوْمَ یَقُومُ الْأَشْہَادُ یَوْمَ لَا یَنْفَعُ الظَّالِمِینَ مَعْذِرَتُہُمْ وَلَہُمُ اللَّعْنَۃُ وَلَہُمْ سُوءُ الدَّارِ» ۱؎ (40-غافر:51-52) ' ہم اپنے رسولوں کی اور ایمانداروں کی مدد فرمائیں گے دنیا میں بھی اور آخرت میں بھی ' ۔

رسولوں کی طرف اس نے وحی بھیجی تھی کہ «وَعَدَ اللہُ الَّذِینَ آمَنُوا مِنکُمْ وَعَمِلُوا الصَّالِحَاتِ لَیَسْتَخْلِفَنَّہُمْ فِی الْأَرْضِ کَمَا اسْتَخْلَفَ الَّذِینَ مِن قَبْلِہِمْ وَلَیُمَکِّنَنَّ لَہُمْ دِینَہُمُ الَّذِی ارْتَضَیٰ لَہُمْ وَلَیُبَدِّلَنَّہُم مِّن بَعْدِ خَوْفِہِمْ أَمْنًا یَعْبُدُونَنِی لَا یُشْرِکُونَ بِی شَیْئًا» ۱؎ (24-النور:55) ' ہم ظالموں کو تہ و بالا کر دیں گے اور ان کے بعد زمینوں کے سرتاج تمہیں بنا دیں گے کیونکہ تم مجھ سے اور میرے عذابوں سے ڈرنے والے ہو ' ۔ وہ پہلے ہی فرما چکا تھا کہ تم میں سے ایمانداروں اور نیک کاروں کو میں زمین کا سلطان بنا دوں گا جیسے کہ پہلے سے یہ دستور چلا آ رہا ہے ایسے لوگوں کو اللہ تعالیٰ ان کے دین میں مضبوطی اور کشائش دے گا جس کے دین سے وہ خوش ہے اور ان کے خوف کو امن سے بدل دے گا کہ وہ میری عبادت کریں اور میرے ساتھ کسی کو شریک نہ ٹھرائیں ۔ «اَلْحَمْدُ لِلہِ» اللہ تعالیٰ نے اس امت سے اپنا یہ وعدہ پورا فرمایا ۔ «وَلَہُ الْحَمْدُ وَالْمِنَّۃِ أَوَّلًا وَآخِرًا ، بَاطِنًا وَظَاہِرًا» ۔

حجم الخط:
شارك الصفحة
فضلًا انتظر تحميل الصوت