أرشيف الكتب الإسلامية
فهرس الكتاب

‹
›
الصفحة 1772 من 6343

آیت (10) پر غور کرو، قوموں کا ہمیشہ یہی جواب رہا کہ ہمیں تمہاری دعوت کی سچائی میں شک ہے ہم نہیں مانتے لیکن پیغمبروں کی پکار بھی یہی رہی ہے کہ (افی اللہ شک فاطر السموات والارض) کس بارے میں تمہیں شک ہورہا ہے ؟ اللہ کے بارے میں جو آسمان و زمین کا بنانے والا ہے ؟ یعنی اس ہستی کے بارے میں جس کا اعتقاد تمہاری طرف فطرت کے خمیر میں موجود ہے اور تمہارے دل کا ایک ایک ریشہ کہہ رہا ہے کہ ایک (فاطر السموات والارض) ہستی موجود ہے؟ دنیا کی ہر بات میں تم شک کرسکتے ہو لیکن اس بارے میں تم شک نہیں کرسکتے، تم کیونکر جرات کرسکتے ہو کہ اپنے دل کے یقین سے انکار کردو، اپنی روح کے اعتقاد سے منکر ہوجاؤ، خود اپنی نسبت شک کرنے لگو؟

یہ قرآن کی معجزانہ بلاغت ہے کہ صرف ایک چھوٹے سے جملے اور استفہام تقریری میں وہ سب کچھ بیان کردیا جو زیادہ سے زیادہ اس بارے میں کہا جاسکتا ہے اور جو استدلال کی اتنہا، اثبات کی تکمیل، اور سارے برہانوں اور حجتوں کا جامع و مانع خلاصہ ہے۔ یعنی (افی اللہ شک شک فاطر السموات والارض) (تفصیل کے لیے دیکھو تفسیر سورۃ فاتحہ)

حجم الخط:
شارك الصفحة
فضلًا انتظر تحميل الصوت