أرشيف الكتب الإسلامية
فهرس الكتاب

‹
›
الصفحة 3244 من 6343

(9) قرآن کا اسلوب بیان یہ نہیں کہ نظر مقدمات اور ذہنی مسلمات کی شکلیں ترتیب دے، پھر اس پر بحث وتقرر کرکے مخاطب کو ردوتسلیم پر مجبور کرے، اس کا تمام ترخطاب انسان کے فطری وجدان وذوق سے ہوتا ہے وہ کہتا ہے کہ خدا پرستی کا جذبہ انسانی فطرت کا خمیر ہے اگر ایک انسان اس سے انکار کرنے لگتا ہے تو یہ اس کی غفلت ہے ضروری ہے کہ اسے غفلت سے چونکادینے کے لیے دلیل پیش کی جائے لیکن یہ دلیل ایسی ہونی چاہیے کہ جو محض ذہن ودماغ میں کاوش پیدا کردے بلکہ ایسی ہونی چاہیے جو اس کے نہاں خانہ دل پر دستک دے اور اس کا فطری وجدان بیدار کردے۔ ان آیات میں جو سوالات ہیں ان میں سے ہر سوال اپنی جگہ ایک مستقل دلیل ہے کیونکہ ان میں سے ہر سوال کا صرف ایک ہی جواب ہوسکتا ہے اور وہ فطرت انسانی کا عالمگیر اور مسلمہ اذعان ہے ہمارے متکلموں کی نظر اس پہلو پر نہ تھی اس لیے قرآن کا اسلوب استدلال ان پر واضح نہ ہوسکا اور وہ دوردراز گوشوں میں بھٹک گئے، قرآن خود انسان کی فطرت ہی سے انسان پر حجت لاتا ہے۔

حجم الخط:
شارك الصفحة
فضلًا انتظر تحميل الصوت