3757 حَدَّثَنَا أَحْمَدُ بْنُ حَنْبَلٍ وَمُسَدَّدٌ الْمَعْنَى قَالَ أَحْمَدُ حَدَّثَنِي يَحْيَى الْقَطَّانُ عَنْ عُبَيْدِ اللَّهِ قَالَ حَدَّثَنِي نَافِعٌ عَنْ ابْنِ عُمَرَ أَنَّ النَّبِيَّ صَلَّى اللَّهُ عَلَيْهِ وَسَلَّمَ قَالَ إِذَا وُضِعَ عَشَاءُ أَحَدِكُمْ وَأُقِيمَتْ الصَّلَاةُ فَلَا يَقُومُ حَتَّى يَفْرُغَ زَادَ مُسَدَّدٌ وَكَانَ عَبْدُ اللَّهِ إِذَا وُضِعَ عَشَاؤُهُ أَوْ حَضَرَ عَشَاؤُهُ لَمْ يَقُمْ حَتَّى يَفْرُغَ وَإِنْ سَمِعَ الْإِقَامَةَ وَإِنْ سَمِعَ قِرَاءَةَ الْإِمَامِ
سیدنا عبداللہ بن عمر ؓ سے روایت ہے کہ نبی کریم ﷺ نے فرمایا " جب تم میں سے کسی کا رات کا کھانا رکھ دیا گیا ہو اور نماز کی اقامت بھی ہو گئی ہو تو ( نماز کے لیے ) نہ اٹھے حتیٰ کہ کھانے سے فارغ ہو جائے ۔ " مسدد نے مزید کہا کہ سیدنا عبداللہ ( عبداللہ بن عمر ؓ ) کے لیے رات کا کھانا رکھ دیا جاتا یا شام کا کھانا تیار ہو جاتا تو وہ کھانے سے فارغ ہو جانے تک نہ اٹھتے خواہ اقامت سن لیتے یا امام کی قرآت سن رہے ہوتے ۔
فائدہ۔نمازایسی عبادت ہے جس میں رب زوالجلال سے مناجات ہوتی ہے۔تو انسان کواپنے فطری عوارض سے فارغ ہوکر پوری یکسوئی سے نماز اد ا کرنی چاہیے۔کھانے پر پہنچنے سے پہلے نماز کا بوجھ اتارنے کی کوشش قطعًا مناسب نہیں۔اسی طرح پیشاب پاخانے کےتقاضے ہیں۔ضروری ہے کہ انسان پہلے ان امور سے فارغ ہولے ایسا نہ ہو کہ دھیان کھانے وغیرہ کی طرف لگا ہوا ور نماز میں یکسوئی حاصل نہ ہو پائے۔