أرشيف الكتب الإسلامية
فهرس الكتاب

‹
›
الصفحة 2016 من 6343

(64) مشرکین مکہ کا قرآن کریم سے متعلق ایک شبہ بیان کیا گیا ہے اور اس کی تردید کی گئی ہے، قرآن کریم میں بعض جگہوں میں ایسا ہوا ہے کہ اللہ تعالیٰ نے ایک آیت نازل فرمائی، پھر مخلوق کی مصلحت کے پیش نظر اس آیت کو منسوخ کردیا اور اس کی جگہ دوسرے حکم نے لے لی۔ مشرکین اپنی کم عقلی اور قلت ایمانی کی وجہ سے کہتے ہیں کہ محمد جھوٹا ہے، ہر روز اپنی طرف سے ایک نئی بات پیدا کرتا ہے اور کہتا ہے کہ یہ تبدیلی اللہ کی جانب سے ہے۔ سورۃ البقرہ آیت (106) (ما ننسخ من آیۃ او ننسھا نات بخیر منھا) کی تفسیر میں اس بارے میں تفصیل کے ساتھ لکھا جاچکا ہے۔ وہاں یہ بتایا جاچکا ہے کہ قرآن کے بارے میں یہ شبہ یہود پھیلاتے تھے اور یہاں مفسرین نے لکھا ہے کہ یہ شبہ مشرکین مکہ پھیلاتے تھے، معلوم ہوتا ہے کہ تمام کافروں کا یہ شیوہ تھا اور آج بھی ملحدین اور دشمنان اسلام کا یہی طریقہ ہے۔ ان سب کے اسی شبہ کا ازالہ کیا گیا ہے اور کہا گیا ہے کہ اللہ تعالیٰ کبھی اپنے بندوں کی مصلحت کی خاطر ایک آیت نازل فرماتا ہے، پھر اپنی حکمت کے تقاضے کے مطابق اسے منسوخ کردیتا ہے، اور اس کی جگہ دوسرا حکم لے آتا ہے۔ محمد اپنی طرف سے کوئی بات نہیں کہتے، بلکہ جبریل اپنے رب کے حکم سے اسے آپ کے پاس لے کر آتے ہیں، تاکہ مومنوں کے ایمان و ایقان میں اضافہ ہو، جیسے بارش کا پانی جب زمین پر پڑتا ہے تو اسے زندہ کردیتا ہے، اسی طرح نزول قرآن سے مومنوں کے دلوں کو زندگی ملتی ہے۔ قرآن ہدایت کا سرچشمہ ہے، اور مسلمانوں کو فلاح دارین کی خوشخبری دیتا ہے۔ (وھدی و بشری للمسلمین) میں اس اشارہ ہے کہ یہ قرآن مسلمانوں کے برعکس دشمنان اسلام کے کفر کو اور بڑھا دیتا ہے اور ان کے غم میں اضافہ کردیتا ہے۔

حجم الخط:
شارك الصفحة
فضلًا انتظر تحميل الصوت