أرشيف الكتب الإسلامية
فهرس الكتاب

‹
›
الصفحة 6322 من 6343

(1) اللہ تعالیٰ نے نبی کریم (صلی اللہ علیہ وآلہ وسلم) کو مخاطب کر کے فرمایا: اے میرے نبی ! اب جبکہ آپ اپنے دشمنوں کے خلاف ہر معرکے میں غالب آ نے لگے ہیں اور مکہ کو فتح کرلیا ہے اور وہ دارالکفر سے دارالاسلام بن گیا ہے اور قبائل عرب گروہ درگروہ اللہ کے دین میں داخل ہو رہے ہیں ابتدائے اسلام کی طرح نہیں جب لوگ کافروں کے ڈر سے اکا دکا اسلام میں داخل ہوتے تھے، جب یہ سب نعمتیں حاصل ہوگئیں، تو آپ اپنے رب کا شکر بجالانے کے لئے اس کی پاکی اور اس کی حمد و ثنا بیان کیجیے اور اس سے مغفرت طلب کرتے رہئے، بعض ان کوتاہیوں کے لئے جن کا احساس آپ کو خود ہی ترک اولیٰ کے سبب ہوتا رہا ہے، اللہ تعالیٰ توبہ کرنے والے بندوں کی توبہ کو بہت جلد قبول کرتا ہے، ان کے گناہوں کو معاف کردیتا ہے اور ان کے حال پر رحم کرتا ہے۔

فائدہ:

اس سورت میں نبی کریم (صلی اللہ علیہ وآلہ وسلم) کے لئے ایک خوشخبری ہے اور جب وہ خوشخبری ظاہر ہوجائے تو رسول اللہ (صلی اللہ علیہ وآلہ وسلم) کے لئے ان کے رب کی طرف سے ایک حکم ہے، ایک بات کی طرف اشارہ ہے اور ایک تنبیہہ ہے:

خوشخبری یہ ہے کہ اللہ اپنے رسول کی مدد کرے گا مکہ مکرمہ فتح ہوگا اور لوگ جوق در جوق اسلام میں داخل ہوں گے حکم یہ ہے کہ آپ مذکورہ بالا نعمتوں پر اپنے رب کا شکر ادا کریں، اس کی پاکی اور حمد و ثنا بیان کریں اور اس سے مغفرت طلب کریں اس میں دو اشارے ہیں، ایک یہ کہ اللہ دین اسلام کی ہمیشہ مدد کرتا رہے گا، اور اس کا شکر ادا کرنے اور اس کی حمد و ثنا میں لگے رہنے سے اس کی نصرت و تائید میں اضافہ ہوتا رہے گا اور تاریخ شاہد ہے کہ جب تک مسلمان قرآن و سنت کی راہ پر گامزن رہے، ان کو اللہ کی نصرت و تائید ہمیشہ حاصل ہوتی رہی، یہاں تک کہ اسلام دنیا کے کونے کونے تک پہنچ گیا، دوسرا اشارہ یہ ہے کہ نبی کریم (صلی اللہ علیہ وآلہ وسلم) کی وفات کا وقت قریب آچکا ہے۔

اور تنبیہہ یہ ہے کہ چونکہ دنیا سے آپ کے رخصت ہونے کا وقت قریب ہوچکا ہے اس لئے آپ (صلی اللہ علیہ وآلہ وسلم) کو چاہئے کہ اپنا زیادہ سے زیادہ وقت اس کی یاد میں لگائیں، تاکہ عمر کا آخری حصہ اس کی یاد میں گذرے امام بخاری نے عائشہ (رض) سے روایت کی ہے کہ سورۃ النصر کے نازل ہونے کے بعد رسول اللہ (صلی اللہ علیہ وآلہ وسلم) ہر نماز میں " سبحانک ربنا وبحمدک، اللھم اغفرلی" پڑھنے لگے۔

حجم الخط:
شارك الصفحة
فضلًا انتظر تحميل الصوت