أرشيف الكتب الإسلامية
فهرس الكتاب

‹
›
الصفحة 3183 من 6343

60۔ شعراء بالعموم ویسے ہی ہوتے ہیں جیسی ان کی مذکورہ بالا آیتوں میں صفات بیان کی گئی ہیں، لیکن کچھ ایسے بھی ہوتے ہیں جو اہل ایمان ہوتے ہیں، اور ان کی زندگی عمل صالح کرتے گذر جاتی ہے، اور اپنے اشعار میں اللہ، اس کے رسول اور دین اسلام اور اخلاق حسنہ کی باتیں کرتے ہیں، اور اگر کوئی دشمن اللہ یا اس کے نبی کی ہجو بیان کرتا ہے تو اس کا جواب دیتے ہیں۔ ایسے شعراء کو اللہ تعالیٰ نے اس آیت کریمہ میں عام شاعروں سے مستثنی قرار دیا ہے، جیسے عبداللہ بن رواحہ، حسان بن ثابت، کعب بن مالک اور کعب بن زہیر وغیرہم، جنہوں نے نبی کریم (صلی اللہ علیہ وآلہ وسلم) اور دین اسلام کا دفاع کیا، اور نبی کریم (صلی اللہ علیہ وآلہ وسلم) نے مختلف اوقات میں ان کی تعریف کی اور انہیں دعا دی۔ عبداللہ بن رواحہ سے کہا، اللہ کی قسم ! تمہارے اشعار کافروں پر تیر سے بھی زیادہ کاری ضرب لگاتے ہیں۔ (مسند احمد) اور حسان بن ثابت (رض) سے کہا: مشرکین کی ہجو بیان کرو جبریل تمہارے ساتھ ہیں (ابن سعد، ابن ابی شیبہ) ایک موقع سے کہا: اے اللہ احسان کی جبریل کے ذریعہ مدد فرما (مسند احمد، ابن سعد) اور یہ حکم قیامت تک باقی رہے گا، یعنی جو شعراء ایمان و عمل صالح کو اپنا شعار بنائیں گے، توحید کی راہ پر گامزن ہوں گے، بدعت و خرافات سے دور ہوں گے، اور ان شاعروں کی تردید کریں گے جو اسلام پر اوچھے حملے کریں گے، یا کفر و بدعت کو رواج دینے کی کوشش کریں گے، یا بھلائی سے روکیں گے اور برائی کی دعوت دیں گے، تو وہ حسان بن ثابت اور عبداللہ بن رواحہ جیسے شاعروں کے زمرے میں داخل ہوں گے۔

آیت کے آخر میں کفار مکہ کو دھمکی دی گئی ہے جو رسول اللہ (صلی اللہ علیہ وآلہ وسلم) کو کبھی کاہن اور کبھی شاعر کہتے تھے اور قرآن کریم کو جادو اور شاعری کا نام دیتے تھے۔

حجم الخط:
شارك الصفحة
فضلًا انتظر تحميل الصوت