أرشيف الكتب الإسلامية
فهرس الكتاب

‹
›
الصفحة 4605 من 6343

جس طرح مومن و کافر اور موحد و مشرک کے درمیان فرق ہے، اسی طرح روز قیامت ان کے دائمی ٹھکانوں میں بھی فرق ہے۔ اللہ تعالیٰ نے فرمایا کہ اس جنت کے اوصاف جس کا قیامت کے دن اہل تقویٰ سے وعدہ کیا گیا ہے، یہ ہیں کہ اس میں پانی کی ایسی نہریں ہوں گی جن کا پانی کبھی بھی بدمزا نہیں ہوگا، اور اس میں دودھ ایسی نہریں ہوں گی جن کا دودھ نہایت سفید اور نہایت میٹھا ہوگا، اور کبھی کھٹا نہیں ہوگا اور اس شراب کی ایسی نہریں ہوں گی جن میں پائی جانے والی شراب دیکھنے میں نہایت خوبصورت اور پینے والوں کے لئے نہایت لذیذ ہوگی، اہل جنت کا جی ان کے پینے سے کبھی نہیں اکتائے گا۔ سورۃ الصافات آیات (46/47) میں اللہ تعالیٰ نے فرمایا ہے: (بیضاء لذۃ لشاربین، لافیھاغول ولا ھم عنھا ینزقون) " جنت کی شراب صاف شفاف اور پینے میں نہایت لذیذ ہوگی، نہ اس کے پینے سے درد سر ہوگا، اور نہ جنتی اسے پی کر بہکیں گے" اور اس میں ایسے شہد کی نہریں ہوں گی جو موم، یا چھتے کے ٹکڑوں اور ہر میل کچیل سے صاف ہوگا اور اہل جنت کو وہاں مذکورہ بالا مشروبات کے علاوہ انواع و اقسام کے پھل بھی ملیں گے۔ سورۃ الدخان آیت (55) میں اللہ تعالیٰ نے فرمایا ہے: (یدعون فیھا بکل فاکھۃ آمنین) " وہاں وہ ہر طرح کے میوؤں کی فرمائشیں کریں گے، اور بہت ہی پرسکون ہوں گے" اور سورۃ الرحمٰن آیت (52) میں فرمایا ہے: (فیھما من کل فاکھۃ زوجان) " ان دونوں میں ہر قسم کے میوؤں کی دو قسمیں ہوں گی۔ "

مسند احمد اور سنن ترمذی میں صحیح سند کے ساتھ معاویہ بن حیدہ (رض) سے مروی ہے، انہوں نے کہا، میں نے رسول اللہ (صلی اللہ علیہ وآلہ وسلم) سے سنا ہے کہ جنت میں دودھ کا سمندر ہوگا، پانی کا سمندر ہوگا، شہد کا سمندر ہوگا اور شراب کا سمندر ہوگا اور ان سمندروں سے نہریں جاری ہوں گی۔

اہل جنت پر اللہ تعالیٰ یہ بھی احسان کرے گا کہ ان کے چھوٹے بڑے تمام گناہوں کو معاف کر دے گا۔

جن خوش نصیب لوگوں پر اللہ کے اتنے عظیم احسانات ہوں گے، کیا وہ ان کے مانند ہوں گے جو ہمیشہ کے لئے جہنم میں ڈال دیئے جائیں گے۔ اس سے کبھی نہیں نکلیں گے اور جنہیں پینے کے لئے اتنا شدید گرم پانی ملے گا کہ پیتے ہی ان کی انتڑیاں ٹکڑے ٹکڑے ہو کر سرین کے راستے باہر نکل جائیں گی۔

حجم الخط:
شارك الصفحة
فضلًا انتظر تحميل الصوت